Гурван өдрийн турш үргэлжилсэн Ерөнхий сайд асан М.Энхсайханд холбогдох шүүх хурал дөнгөж сая дууслаа. Шүүхээс түүнийг Эрүүгийн хуулийн тусгай ангийн 19.6 дугаар зүйлийн 1 дэх хэсэг, мөн хуулийн тусгай ангийн 22.1 дүгээр зүйлийн 1, 2 дахь хэсгүүдэд зааснаар буруутган шүүж, улмаар түүнд Эрүүгийн хуулийн 22.1 дүгээр зүйлийн 1, 2 дахь хэсгүүдэд зааснаар яллах дүгнэлт үйлдэж ирүүлсэн хэргийг 22.2 болгон нэгтгэн зүйлчлэх нь зүйтэй байна гэж үзлээ.
Ингээд шүүхийн шийдвэрийн талаар БЗД, Сүхбаатар, Чингэлтэй дүүргийн шүүхээс тодруулахад "Прокуророос М.Энхсайханд холбогдуулан яллах дүгнэлт үйлдэн ирүүлсэн Эрүүгийн хуулийн тусгай ангийн 19.6 дугаар зүйлийн 1 дэх хэсэгт заасан үйлдлийг тусгаарлаж, нэмэлт мөрдөн шалгах ажиллагаа хийлгэхээр прокурорт буцааж,
Эрүүгийн хуулийн тусгай ангийн 22.1 дүгээр зүйлийн 1 дэх хэсгийг мөн хуулийн 22.1 дүгээр зүйлийн 2 дах хэсэгт нэгтгэн шүүгдэгч М.Энхсайханд Нийтийн албанд томилогдох эрхийг 4 жилийн хугацаагаар хасч, 4 жил 6 сарын хугацаагаар хорих ялаар шийтгэж, эрх хасах ялыг хугацаатай хорих ял эдэлж дууссан цагаас эхлэн тооцсон.
Мөн хорих ялыг нээлттэй хорих байгууллагад элдлүүлэхээр тогтсон байна" гэлээ.
М.Энхсайханы өмгөөлөгч Д.Оросоогоос шүүхийн шийдвэрийн талаар тодрууллаа.
-Анхан шатны шүүхийн шийдвэр гарлаа. Санал нийлэх үү?
-Үгүй. Нэг талыг барьж мөрдөн байцаалт явагдсан. Шинжээч нар алдаатай дүгнэлт гаргаснаа хүлээн зөвшөөрсөн. Прокурорт буцааж дахин шалгах хангалттай боломж байсан. Тиймээс бид давж заалдах шатны шүүхэд хандана.
-Эрүүгийн хуулийн хоёр зүйл ангийг нэгтгэж, шүүгдэгчийн эрхзүйн байдлыг дээрдүүллээ гэж шүүгч тайлбарласан?
-Дээрдүүлсэн юм биш. Гэмт хэрэг үйлдсэн гэж үзэж байгаа цаг хугацаанд хэрэглэж байсан хуулийг буюу 2002 оны хуулийг хэрэглэсэн бол дээрдсэн гэж үзэх байлаа. Гэмт хэрэг үйлдэгдээгүй. Гэрээний төсөл боловсруулсан л үйл явдал. Үүнийг гэмт хэрэг үйлдсэн гэж үзэх хууль зүйн үндэслэл байхгүй.
Б.Аз
