Олимпийн аварга Н.Түвшинбаяр улсын өсөх идэр начин Э.Энхбатыг зодож биед нь хүнд гэмтэл учруулсан тухай мэдээллийг бид өмнө нь мэдээлсэн.
Э.Энхбатын эхнэр Б.Нандинцэцэг нөхцөл байдлын талаар хэвлэлд ярилцлага өгчээ.
-Начины биеийн байдал ямар байна вэ?
-Сэхээнд байгаа. Маш хүнд байгаа. Дунд тархины гэмтэл, тархины дагзны хугарал, урд дагз нь нээгдчихсэн байсан, өчигдөр. Зулай нь нээгдчихсэн. Эмч нар хэлэхдээ “Ийм тийм байна” гэж шууд хэлэх боломжгүй. Дахин нарийн зургууд авах шаардлагатай гэсэн.
Нөхрийг маань вискиний шилээр цохьсон байгаа юм. Шил нь хагараагүй. Тэр шилнийх нь булан бөөн цус болчихсон байсан. Би бүгдийг нь бичиж авсан. Тэрүүгээр нэг шилний хэлтэрхийнүүд, “Болор” хундагууд хагарчихсан байсан. Нөхрийн маань нүүр ам, гар хуруу, хоёр өвдөг улаан нялга байсан. Манай нөхрийг үнэхээр хариу үйлдэл хийхгүй болтол архи уулгаж байгаад зориудаар ингэсэн.
Түвшинбаяр аварга согтож сүйд болоогүй байсан. Намайг ороход үүдэнд сууж байсан.
-Тэд багын найзууд байгаа. Өмнө нь ингэж маргалдаж байсан уу. Ямар нэгэн өс хонзон байсан уу?
-Манай нөхөр ямар ч хүнд яаж ч дургүй хүрсэн шүдээ зуугаад өнгөрч чаддаг. Хүнд хатуурхаж чаддаггүй.
Өчигдөр 18:18 цагт над руу 1 минут яриад тасарсан. “Хайраа би “Их хуралдай”-гийн 9 давхарт оффис дээр очих гэж байна” гэсэн. Би “Битгий архи уугаарай” гэхэд “Уухгүй уухгүй” гээд л тасарсан. Орой 21:00 цаг хүртэл чимээгүй байсан. Би гайхаад утас руу залгатал аваагүй. Хэзээ ч ямар ч хүнд үед утсаа авдаг хүн.
-Таныг очиход нөхцөл байдал ямар байсан бэ?
-Манай нөхрийн хувцас хунар цусандаа будагдчихсан. Улаан нялга, нүд ам танигдахын аргагүй. Шүд нь байгаа юм уу үгүй юм уу гэмээр. Нүд ам нь нээгдэх боломжгүй. Хөмсөгний дор сэтрээд мах нь гарчихсан, нүдний дор бас хацар дээр нь мах нь гараад унжчихсан. Үнэхээр шоконд орсон. Түвшинбаярыг би үсдээд чимхээд маажаад хаячихмаар байсан. Цагдаа нар байсан болохоор дараа нь би асуудалд орох вий гэж эмээгээд биеэ барьсан.
Н.Түвшинбахяр юу ч хэлээгүй. Гэхдээ тэр хүн удаа дараа ийм зодоон хийж байсан. Манай нөхрийг биш. Манай гэр бүлийн найз Хосбаярыг хэдэн жилийн өмнө гудамжинд зодоод бөөн юм болсон. Цагдаа энэ тэр гээгүй чимээгүй хаясан.
-Э.Энхбат начин Н.Түвшинбаяр аварга 2 юунаас болж маргасан юм бол?
-Юунаас болж маргасныг мэдэхгүй. Хоёр удаа олимпийн бэлтгэл хангагчийг нь манай нөхөр хийж байсан. Үндэсний бөхийн мундаг тамирчин байсан хүн. Ид барилдаж байх үедээ Н.Түвшинбаярын олимпийн бэлтгэлийг хангаад, баярлаад явж ирсэн. Заан болоход нь зодог шуудгаа тайлж өгөөд ирж байсан. Би болон миний хань тэдний гэр бүлд ямар ч өр байхгүй.
Одоо гол нөхрөө яаж эрүүл саруул болгох вэ гэдэг л асуудал байна.
-Өчигдөр оройноос хойш Н.Түвшинбаяр аваргын ар гэр нь холбогдов уу?
-Үгүй.
-Эмч нар юу гэж байна вэ?
-Өчигдөр сэхээнд ороход эмч нь тархины хугарал, дотоод яасны хугарал, гавлын яасны бяцрал, духны цөмрөл болсон. Духанд нь цус хуралт явагдсан. Азаар нэмэгдэхгүй бол гайгүй гэж байсан. Тийм болохоор хөдөлгөж болохгүй. 3 хоног тайван байлгах ёстой гэсэн.
Эх сурвалж: shuurhai.mn
