Говь-Алтай аймгийн Хилийн цэргийн 0214 дүгээр ангийн хугацаат цэргийн хоёр алба хаагч харуулын даргаа буудаж хөнөөгөөд буутайгаа зугтсан хэрэг гараад байна.
Толруулбал, 19 настай М, Х нар үйлдсэн бөгөөд харуулын дарга 34 настай Г гэгчийг буудаж хөнөөгөөд зугтсан юм.
Энэ талаар ЦЕГ-ын Хэвлэл мэдээллийн төвийн дарга Б.Баатархүү мэдээлэл өглөө. Тэрбээр "2021 оны дөрөвдүгээр сарын 8-ны өдрийн 22.58 цагт Говь-Алтай аймгийн цагдаагийн газарт "Хилийн цэргийн дугаар ангийн постон дээр хүн нас барсан байна" гэсэн дуудлага мэдээлэл ирсэн.
Дуудлагын дагуу аймгийн цагдаагийн газраас ажлын хэсэг гарч хэргийн газарт ажиллахад харуулын дарга ажилтай 34 настай хүн буудуулсан байдалтай нас барсан байсан. Харуулын үүрэг гүйцэтгэж байсан цэргийн алба хаагчид галт зэвсэг авч хэргийн газрыг орхин явсан нөхцөл байдал тогтоогдсон.
Яг одоо гэмт хэрэг үйлдсэн байж болзошгүй сэжигтэй этгээдүүдийг эрэн сурвалжлах, байршлыг тогтоож, хяналтандаа авах ажиллагааг аймгийн цагдаагийн газар, хилийн цэргээс явуулж байна.
Тус хэрэгт сэжиглэгдэж байгаа этгээдүүд галт зэвсэгтэй явж байгаа учраас бусдад болон өөрсдөдөө хохирол учруулах эрсдэлтэй. Тиймээс, цагдаагийн байгууллагаас онцгой анхаарал хандуулж, шуурхай баривчлахаар ажиллаж байна. Хилийн цэргийн ангийн ойролцоо байгаа айл өрхүүддээ болгоомжтой байхыг зөвлөж байна" гэдгийг онцоллоо.
