Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалтад оролцож байгаа Монгол Улсын Ерөнхийлөгч У.Хүрэлсүх БНЭУ-ын Ерөнхий сайд Нарендра Модитэй уулзлаа.
Энэтхэгийн Ерөнхий сайд Моди Монгол заншлаар Ерөнхийлөгч У.Хүрэлсүхтэй гар зөрүүлэн золгож, мэндчилсэн нь содон байв.
Ерөнхийлөгч У.Хүрэлсүх Монгол Улсын Шадар сайдаар ажиллаж байхдаа Энэтхэгт айлчилж Нарендра Модитэй анх уулзсан байдаг. Тэгэхдээ мөн л гар зөрүүлж мэндчилж байв.
Энэ нь манай хоёр улс хоёул бурханы шашны өлгий нутаг, оюун санааны хөршүүд гэдгийн нотолгоо болж буй бас нэг жишээ биз ээ.
Ерөнхийлөгч У.Хүрэлсүхтэй уулзах үеэрээ Энэтхэгийн Ерөнхий сайд Моди: “Монголд айлчлахдаа хэлсэн бүх зүйлээ биелүүлсэн” гэдгээ хэлжээ. Мөн Монгол Улсын Ерөнхийлөгчийг тааламжтай цагтаа айлчлал хийвэл бид баяртайгаар угтан авахад бэлэн байна хэмээн урьсан байна.
Түүнчлэн манай улсад хамтран эхлүүлсэн нефтийн үйлдвэрийн бүтээн байгуулалтын явцыг ярилцан Ерөнхийлөгч У.Хүрэлсүхийн Ерөнхий сайд байхдаа эхлүүлсэн тус нефтийн үйлдвэрийн шийдвэр маш зөв алхам болсон гэж онцолжээ.
Дашрамд дурьдахад Нарендра Моди Энэтхэгийн Ерөнхий Сайд болмогцоо анхны гадаад айлчлалаа Монгол Улсад хийж байсан юм.
Э.Мягмар