Өнгөрсөн долоо хоногт Байгал-Амарын төмөр замын Буриадын нутаг дээгүүр дамжин өнгөрдөг хэсэгт хоёр удаа дэлбэрэлт болсон билээ. Хятад, Умард Солонгостой холбогддог ачаа тээврийн гол замыг дэлбэлэх ажиллагааг Украины аюулаас хамгаалах алба зохион байгуулснаа хүлээсэн юм.
Тэгвэл энэхүү ажиллагаанд оролцсон Беларусийн иргэнийг өчигдөр баривчилснаа ОХУ-ын Холбооны Аюулаас Хамгаалах Алба мэдээлжээ.
“Арваннэгдүгээр сарын 29, 30-ны өдрүүдэд Буриадын нутаг дэвсгэрт Байгал-Амарын төмөр замаар зорчиж байсан хоёр ачааны галт тэргийг дэлбэлсэн хэрэгтэй холбогдуулан Омск мужийн нутаг дэвсгэрээс 1971 онд төрсөн Беларусийн иргэнийг баривчиллаа” гэж дээрх мэдэгдэлд өгүүлсэн байна.
Украины аюулаас хамгаалах албанд ажилладаг, Литвад амьдардаг Беларусийн иргэн уг ажиллагааг зааварлаж, зохион байгуулсныг олж тогтоосноо бас мэдээлжээ.
Хэн нэгнээс мөнгө авч, заавраар нь галт тэрэгний цуваанд соронзтой тэсрэх бөмбөг байрлуулснаа баривчлагдсан хүн хүлээсэн гэнэ.
Уг ажиллагаанд өөр хүн оролцсон эсэхийг үргэлжлүүлэн шалгаж байгаагаа ОХУ-ын аюулаас хамгаалах алба мэдэгджээ.
Эх сурвалж: AFP
