Монгол Улсаас БНХАУ-ын ӨМӨЗО-ны Хөх хотод Ерөнхий консулаар сууж байсан Д.Мөнх-Эрдэнэ одоогоос 2 жилийн өмнө эгүүлэн татсан юм. Тэрээр албан үүргээ гүйцэтгэж байх хугацаандаа өөрийн дипломат эрх ямба, дархан эрхээ урвуулан ашиглаж өндөр үнэтэй автомашин БНХАУ-д татваргүйгээр удаа дараа нэвтрүүлсэн хэрэгт холбогдсон юм.
Тэгвэл Д.Мөнх-Эрдэнэ өөрийг нь буруутгасан үндэслэлээр шүүхэд ханджээ.
Засгийн газраас түүнийг эргүүлэн татах тогтоол гаргахдаа Дипломат төлөөлөгчийн газрын тэргүүний давуу эрх, эрх, ямба, дархан эрхийг дордуулж, шүүхээс гэм буруутай үйлдэл тогтоогдож, нотлогдоогүй байхад хүний нэр төрд ноцтой халдаж, халдашгүй дархан эрхийг минь зөрчиж, хууль бусаар эгүүлэн татсан хэмээн үзэж байв. Харин Д.Мөнх-Эрдэнэ эргүүлэн татсан тогтоолын үндэслэлийг “Дипломат ажилтны ажиллах хуулийн хугацаа дууссан учир эргүүлэн татсан” гэх агуулга бүхий болгож өөрчлөхийг Засгийн газраас шаардсан байна.
Энэ асуудлаар БНХАУ-ын Гадаад хэргийн яамнаас 2019 оны 5 дугаар сарын 17-ны өдрийн Монгол Улсаас БНХАУ-д суугаа Элчин сайдын яаманд ноот бичиг хүргүүлсэн байдаг аж.
Уг ноот бичигт “…БНХАУ-ын Хөх хотод суугаа Ерөнхий консулын газрын Ерөнхий консул Д.М … 2018 оны 11 дүгээр сард БНХАУ-ын Гаалийн Ерөнхий газрын контрабандтай тэмцэх байгууллага нь автомашин хууль бусаар хил нэвтрүүлсэн хэргийг илрүүлсэн бөгөөд уг хэрэгт Монгол Улсаас БНХАУ-ын Хөх хотод суугаа Ерөнхий консул Мөнх-Эрдэнийн нэр дээр бүртгэлтэй Range rover маркийн /A005Y9/ автомашин болон Монгол Улсаас БНХАУ-ын ЙГХөх хотод суугаа Ерөнхий консулын газрын нэр дээр бүртгэлтэй Benz маркийн /А395NH, А1234, А1137N/ 3 автомашин байгаа бөгөөд дээрх 4 автомашиныг БНХАУ-ын иргэн “бодитой мөнгө гарган худалдан авч урт хугацаанд ашиглаж байсан ба Ерөнхий консул Мөнх-Эрдэнэ нь үүнээс тодорхой хэмжээний ашиг хүртсэн байна. …Ерөнхий консулын хувьд даргын хариуцах ёстой үүргээ биелүүлээгүй байгаа төдийгүй автомашин хууль бусаар нэвтрүүлж дамлан худалдсан асуудалд шууд холбогдож БНХАУ-ын хууль тогтоомжийг зөрчсөн байна…” хэмээж байжээ.
Монголын 3 шатны шүүх Д.Мөнх-Эрдэнийн гомдлыг хэрэгсэхгүй болгож шийдвэрлэжээ.
Эх сурвалж: shuurhai.mn
