Ардчилсан хувьсгалын алтан хараацай Э.Бат-Үүл. Сүүлийн 30-аад жил ардчиллын тухай ярьж, сануулж, алдааг нь бусдад нялзаахгүй, оноог нь өөртөө наахгүй үүргээ гүйцэтгэж ирсэн хуруу дарам цөөн хүний нэг. Тэр бас Хотыг удирдахдаа мундаг сайн ажилласан. Хамгийн сүүлд хэдхэн хоногийн өмнө тэрээр адчилсан намынхандаа үсдүүлж, чичлүүлэн үзээгүй юмаа үзэв. Олон түмэн түүнийг өмгөөлөн шүүмжилж байна.
Тэгвэл яг энэ цаг үед Э.Бат-Үүлтэй холбоотой өөр нэг ноцтой асуудал босч ирж байна. Энэ нь анх удаагийнх биш. Тэр бол С.Зориг агсны аминд хүрсэн, нэг ёсондоо захиалагчийн тухай. Товчхондоо Э.Бат-Үүл улс төрийн энэ ноцтой хэргийн захиалагч гэж.
Үүнийг Хууль зүй дотоод хэргийн сайд асан, ЗГХЭГ-ын дарга Ц.Нямдорж сүүлийн үед энэ тухай ноцтой ярих болсон. Тэрээр өдөр тутмын сонинд анх удаа томоохон нийтлэл бичиж, түүндээ захиалагчийн тухай түүндээ Э.Бат-Үүлийн тухай онцлон дурджээ. Мөн хоёрхон хоногийн өмнө олон нийтийн өмнө ч "Э.Бат-Үүлийг энэ хэрэгт холбогдуулах шалгахдаа нэг ч мэдүүлэг авч байгаагүй. Ц.Амгаланбаатар 2014 оноос хойш Э.Бат-Үүлийг ярьж байгаа. Түүний мэдүүлгээр Э.Бат-Үүлийг шалгаж, мэдүүлэх авах ёстой” гэж мэдэгдлээ.
Э.Бат-Үүл энэ хэрэгт өмнө нь хоёр ч удаа сэжиглэгдэн, эхнийхэд нь яллагдагчаар татагдан хоригдож байсан. Дараагийн удаа ч багагүй хугацаанд хуулийн байгууллагын үүд эргэсэн. Энэ удаа хуулийн байгууллагыг нэг насаараа удирдаж ирсэн Ц.Нямдорж бат итгэлтэй ярьж эхэллээ.
Ингээд харахад Э.Бат-Үүл өнгөрсөн 20 гаруй жилийн хугацаанд хүн амины ноцтой хэрэг тэр тусмаа өөрсдийн хамтран зүтгэгчийнхээ амийг хөнөөхийг захиалсан хэрэгт гурвантаа холбогдлоо. Энгийн нэгэн битгий улстөрч хүний хувьд энэ бол том асуудал. Харин Э.Бат-Үүлийн хувьд энэ талаар ам нээх нь ховор. Өөрийнх нь нэр хүндтэй холбоотой ноцтой асуудал дэгдэж байхад тэр "Би хийгээгүй, баримт нь энэ" эсвэл "Хуулийнхан үүнийг нэг талд гаргах ёстой" гэж хэлж байсангүй. Уг нь Э.Бат-Үүл нэр төрийнхөө асуудалд ихээхэн эмзэг ханддаг хүн. ЕТГ-ын дарга асан З.Энхболдтой жиргээ төдийнхнөөс болж багагүй шүүхдэж, тэр бүртээ эгдүүцэж байгаагаа хэвлэлээр нэг ярьсан даа.
Харин С.Зоригийн хэрэгт бол тэр өөр байдаг. Улс төрийн ноцтой хэрэг болохоор олон зүйл ярих нь өөрт аюултай гэж боддог уу, эсвэл өөр асуудал байдаг уу. Нэгэнт Ц.Нямдорж сайд энэ асуудлыг нухацтай гаргаж ирж байгаа дээр С.Бат-Үүл ч үүнийг нэг тийш болгож олон нийтийн хардлага сэрдлэгт цэг тавих ёстой. Монголын хууль хүчний байгууллага шуурхай зоригтой ажиллаж 20 гаруй жил сэдэв болж байгаа захиалагчийн хэргийг нэг талд гаргах шаардлагатай болж байна.
Эх сурвалж: shuurhai.mn Г.ОЧИР
