УИХ-ын гишүүн, МАН-ын дарга У.Хүрэлсүх тавдугаар сарын 12( өчигдөр) TV9 телевизийн ярилцлагын нэвтрүүлэгт орох үеээрээ одоогийн Ерөнхийлөгчийг дахин нэр дэвшүүлэхгүйн тулд ҮХЦ -д нөлөөлсөн үү? гэдэг асуултанд хариулт өгсөн юм.
У.Хүрэлсүх: У.Хүрэлсүх дарангуйлал хийх гэж байна гэдэг яриа байгалийн баялгын төлөө тэмцэл хийж эхэлсэн цагаас гарсан шүү дээ. Бизнесийнхэнд халдаж байна гэж ярьж эхэлсэн. Тухайн үед МҮХАҮТ-д хийсэн уулзалт дээр
"Би бизнесийн ертөнцөд байгаа зэрлэгийг нь зулгааснаас биш зүлгийг нь зулгаагаагүй шүү” гэж хэлж байсан юм. Би зэрлэгийг нь зулгааж өгсөн юм. Би байгалийн баялаг хулгайлж байгаагүй. Хулгайд алдагдсан байгалийн баялгыг хурааж, ард түмэндээ авчирсан. Би улсын үйлдвэрийн газруудыг хулгайлж байгаагүй. Би алдагдсан улсын үйлдвэрийн газруудыг эргүүлж ард түмэндээ авчраад, өнөөдөр монголын ард түмэн байгалийн баялагтаа эзэн болоосой, хувь хишгийг нь хүртээсэй гэдэг энэ ажлыг зохион байгуулсныхаа төлөө дарангуйлагч нэр хоч өгсөн.
Тэгээд нөгөө дарангуйлагчид нь өөрсдөө дарангуйллын асуудлыг ярьж эхэлж байгаа байхгүй юу. Би ч бас үр хүүхэдтэй, эцэг хүн. Миний үр хүүхдүүд, миний удам судар маань хэн нэгний өмнө мөргөж битгий амьдраасай гэж би хүсэж байгаа. Харин миний хүүхдүүд хуулийн дор мөргөж амьдраасай гэж хүсэж байна. Хүн гэдэг амьтан тэнгэрийн дор төрж, хуулийн дор захирагдаж амьдардаг жамтай. Тийм учраас бидний баталсан Үндсэн хууль бол ардчилсан хууль. Хүний эрх, эрх чөлөөг эрхэмлэн дээдэлсэн. Парламентийн засаглалыг хамгаалсан ийм Үндсэн хуультай. Энэ хууль л хэрэгжих ёстой. Энэ хуулийг өөрчилж болохгүй. МАН нөлөөлж байгаад, ҮХЦэц дээр одоогийн Ерөнхийлөгчийг нэр дэвшүүлхийг нь болиулчихлаа гэдэг асуудал гарсан. Зарим нэгэнд нь ингэж ойлгогдож байгаа байх. Энэ ҮХЦ гэдэг чинь бие даасан шүүх байгууллага.
Ерөнхийлөгчтэй холбоотой заалт 2025 оноос хойш хэрэгжихээр Үндсэн хуулийн төсөлд явж байсан шүү дээ. Үндсэн хуулийн төсөл яригдаж байх үед ЕТГ-ын дарга З.Энхболд өөрөө оруулж ирээд 2021 оноос хэрэгжихээр болгосон биз дээ. Энэ л хамгийн том маргаантай асуудал нь байсан шүү дээ. Үндсэн хуулиа уншаагүй. Гарын үсэг зурахаасаа өмнө Үндсэн хуулиа уншиж, судлаад, ямар зүйл дээр маргаантай асуудал гарах вэ?гэдгээ судлалгүйгээр, нэг ёсондоо хайнга хийсний үр дүн эцэстээ ийм хуулийн маргаан дагуулж байгаа юм. Тийм учраас би ганц зүйл хэлье. Энэ бол Үндсэн хуулийн асуудал. Үндсэн хуулийн цэцийн асуудал. Энэ бол улстөрийн асуудал биш. Энэ бол хуулийн асуудал.
Үүнд МАН ч юм уу, МАН-ын дарга нөлөөлөөд хийчихдэг тийм зүйл биш. Мөн МАН амлаж байснаараа шүүхийн хуулийг өөрчилнө, бие даасан ,хараат шүүхтэй болгоно гээд 01 сарын 15-нд хуралдаад, шүүхийн хууль батлаад явуулсан. Өнөөдөр Үндсэн хуулийн цэц 62 гишүүний бүлэгтэй УИХ-ын баталсан хуулийг Үндсэн хууль зөрсөн гэж үзэж байна шүү дээ. Тэгэхээр үүнд нөлөөлөөд байна уу? Нөлөөлөл байхгүй гэдэг нь харагдаж байгаа биз дээ? хэмээсэн юм.
