Бусдад бэлгийн болон сэтгэл санааны дарамт удаа дараа учруулсан хэмээх иргэний гомдол мэдээллийн дагуу Ц.Анандбазарыг хуулийн байгууллага шалгаж буй. Мөн түүний талаар МАН-ын дарга У.Хүрэлсүх "Би Ц.Анандбазарыг УИХ-ын гишүүний бүрэн эрхээсээ түдгэлзээд хуулийн байгууллагад шалгуул гэж хэлсэн. Хэрэв тэр хүн гэм буруутай нь тогтоогдвол хариуцлага хүлээх ёстой. Буруугүй бол буцаад ороод ирнэ. Тиймээс намын даргын хувьд энэ хүн түдгэлзэж байгаад шалгуулах ёстой гэдэг зарчмын байр суурьтай байгаа" гэсэн юм.
Үүний дагуу Монгол ардын намын Хяналтын ерөнхий хороо өчигдөр хуралдаж тус намын гишүүн Ц.Анандбазарт хариуцлага тооцох тухай асуудлыг хэлэлцсэн юм.
Хяналтын ерөнхий хорооноос Ц.Анандбазарт ёс зүйн хариуцлага тооцох шийдвэр гаргажээ. Уг шийдвэр гарснаар УИХ-ын гишүүн Ц.Анандбазар намын болон парламент дахь МАН-ын бүлгийн үйл ажиллагаанд оролцох эрхгүй болж байгаа аж. Харин үүнээс цааш хэрхэх талаар тодорхой болгосонгүй.
Олон нийтийн зүгээс Ц.Анандбазарыг УИХ-ын гишүүнээс чөлөөлөхийг шаардаж буй. МАН, УИХ, Засгийн газрын түвшинд ч ийм яриа, байр суурьтай байгаа гэж ойлгогдож байгаа. Гэвч зөвхөн намын гишүүнчлэлээс хасаад өнгөрөх юм биш биз гэдэг асуудал гарч ирж байна.
