Дэлхий даяар нүүрлэж байгаа "Ковид 19" цар тахлын улмаас хэдэн сая хүн амь насаа алдаад байна. Монголд ч нас барагсдын тоо 300 дөхөж байна. Хоёр жил дамжин үргэлжилж байгаа энэ цар тахлыг зогсоох ганц арга вакцинжуулалт гэгдэж байгаа. Үүнийг албан ёсоор ДЭМБ зарласан. Улс орнуудад вакцинжуулалт идэвхтэй үргэлжилж байна. Манайд ч тэр. Вакцины 2 тунд бүрэн хамрагдсан иргэдэд 14 хоногоос эхлэн 99 хувийн дархлаа тогтож байгаа таатай мэдээллийг ЭМЯ өчигдөрхөн зарласан.
Харин вакцины 1-р тунд хамрагдсан иргэд эхний 14 хоногтоо халдвар хамгааллын дэглэм алдагдсанаас халдвар авч байгаа судалгааг танилцуулж байна. Харин 2-р тунд хамрагдагсад халдвар авах нь тун цөөн гэж байна.
Ямартаа ч Монгол Улс дэлхийтэй мөр зэрэгцэн явж байна. Хүн ардынхаа эрүүл мэндийг хамгаалах үйлсэд төр засаг оло улсын жишгийг даган хөдөлж байна. Гэвч вакцинжуулалтад хамрагдахыг хүсэхгүй байгаа нэг хэсэг иргэд бий. Тэд цар тахал эхлэх үеэс "Энэ бол зүгээр ханиад, монгол хүнд тусахгүй" гэцгээж байсан. Харин өнөөдөр 50 мянга гаруй хүн өвчилж, 300 орчим хүн хорвоогийн мөнх бусыг үзүүллээ. Харин дээрх иргэд "Вакцин хийлгэхгүй. Хүний генд нөлөөлнө" хэмээн бурангуй тайлбар хийж үүнийгээ бусдад тулган шаардаж уриалж байна. Энэ бол маш хортой. Үүний тод жишээ өчигдөр боллоо.
Тодруулбал, БШУ-ны сайд Л.Энх-Амгалан өчигдөр яаман дээрээ халдлагад өртөв. Монгол Улсад ийм төрлийн гэмт хэрэг тоотой бүртгэгддэг. Голдуу ахуйн хүрээнд. Гэтэл анх удаа төр засгийн хамгаалалттай байран дээр халдлага үйлдэгдэв. Олон нийтэд ил болсон мэдээллээр хэрэгтэн нь вакин эсэргүүцэгч Д.Совд гэх иргэн гэнэ. Тэрээр "Хүүхдэд вакцин хийх гэлээ" хэмээн эсэргүүцэж ийнхүү хүний амь насанд заналхийлсэн ноцтой гэмт хэрэгт холбогдлоо.
Өнөөдрийн байдлаар Монгол Улс төдийгүй дэлхийн улс орнуудад хүүхдэд вакцин хийж эхлээгүй. Эрдэмтэн судлаачид судалсаар байгаа. Үүнийг Монгол Улс ажиглаж байгаа гэдгийг төрийн хариуцлагатай албан тушаалтнаас эхлээд ЭМЯ өдөр бүр мэдэгдэж байгаа. Мэдээлэл ил тод ойлгомжтой байсаар байхад ийнхүү халдлагын үндэс болж байна гэдэг иргэд ямар мэдээллийг авч, юунд итгэж байна вэ гэдэг асуултын тэмдэг болж эхэлж байна.
Хэдийгээр вакцин хийлгэх эсэх нь хүний эрх ч бүх нийтийн эрүүл мэндийн эсрэг өдөөн турхирч, тэр бүү хэл ноцтой гэмт хэрэгт уриалж байгаа вакцин эсэргүүцэгчдэд хууль хяналтын байгууллага анхаарч эхлэх шаардлагатай болжээ.
Эх сурвалж: shuurhai.mn Г.ОЧИР
