Владимир мужид болсон шүүх хурлаар Лефортовогийн шүүх Алексей Навальныйд чанга дэглэмтэй шоронд есөн жил хорих ял оноож, 1.2 сая рублийн торгууль ногдуулжээ.
Шүүх сөрөг хүчний улстөрчийг онц их хэмжээний залилан хийсэн, шүүхийг үл хүндэтгэсэн хэрэгт буруутай гэж үзжээ.
Түүнийг онц их хэмжээний залилан хийсэн хэрэг гэдэг нь Навальный өөрөө 2011 онд байгуулсан ФБК буюу Авлигатай тэмцэх фонд гэгч арилжааны бус байгууллагад хандивласан мөнгийг хувьдаа завшсан гэж буруутгажээ.
Мөрдөн байцаах хороо 2020 оны арванхоёрдугаар сард хэрэг үүсгэсэн тухайгаа мэдэгдэхдээ Навальныйгийн ФБК нь 588 сая гаруй рубль цуглуулсан бөгөөд үүний 356 сая рублийг улстөрч хувийн хэрэгцээнд зарцуулсан гэж мэдэгджээ.
Харин 30 шахам гэрчүүд болон ФБК-ийн байнгын донорууд ч өөрсдийгөө залилангийн хохирогч гэж үзэхгүй байгаагаа шүүхэд мэдүүлсэн байна. Гэвч шүүх түүнийг буруутгажээ.
Навальный шүүх хурал дээр үг хэлж байгаа нь
"Навальный залилан хийсэн, өөрөөр хэлбэл хууран мэхлэх замаар бусдын эд хөрөнгийг хулгайлсан" гэж шүүгч Маргарита Котова хэлснийг ТАСС иш татжээ.
Өнгөрсөн долоо хоногт улсын яллагч Навальныйг залилан мэхэлсэн, шүүхийг үл хүндэтгэсэн хэрэгт буруутайд тооцож, чанга дэглэмтэй шоронд 13 жил хорих ял оноохоор төлөвлөсөн юм. Прокурор мөн улстөрчөөс 1,2 сая рубль гаргуулахыг хүссэн.
Навальный 3-р сарын 15-нд болсон уулзалтын үеэр: "Надад ялгаагүй. Чи гуйгаад ч болтугай 113 жилйн ял оноо л доо. Намайг болон над шиг хүмүүсийг чи айлгахгүй." гэж хэлсэн байдаг.
Шүүхийн шийдвэр гарахаас хэд хоногийн өмнө шүүгч Марина Котовагийн албан тушаал дэвшүүлэх тухай ОХУ-ын Ерөнхийлөгч Владимир Путины зарлигийг хууль зүйн мэдээллийн портал дээр нийтэлсэн бөгөөд түүнийг Лефортовский дүүргийн шүүхээс Москва хотын шүүхэд шилжүүлж байна.
Эх суралж: ВВС
