ОХУ-ын ерөнхийлөгч Владимир Путин улс орныг нь Умард, Өмнөд Солонгос шиг хоёр хуваах төлөвлөгөөтэй байгааг Украины цэргийн тагнуулын албаны дарга Кирило Буданов хэвлэлд ярьжээ.
Тэрбээр өнгөрсөн оны арваннэгдүгээр сард ОХУ-ын эрх баригчид Украиныг эзлэх дайнд бэлдэж байгаа тухай анхааруулж байсан юм.
Оросын тал эхлээд Киев хотыг эзэлж, Володимир Зеленскийн засгийн газрыг түлхэн унагах төлөвлөгөөтэй байсан ч одоо хэрэгжих боломжгүй болсон тул Украиныг хоёр хуваах шинэ стратеги рүү шилжсэн гэж үзэж байгаагаа Буданов өчигдөр хэвлэлд ярьсан байна.
Баасан гарагт ОХУ-ын батлан хамгаалах яам Украинд явуулж буй ажиллагааных нь эхний хэсэг зорилгодоо хүрсэн тул Донбассын бүс нутгийг бүрэн чөлөөлөх дараагийн шатандаа шилжих болсныг мэдээлсэн юм.
1950-1953 онд үргэлжилсэн Солонгосын дайны дараа 38 дугаар өргөргөөр хуваагдсан Умард ба Өмнөд Солонгос улсууд бий болсон билээ.
“Путин ажиллагааныхаа үндсэн чиглэлийг Украины өмнөд ба дорнод хэсэг рүү шилжүүлээд байна. Энэ бол Солонгос маягийн хуваагдлыг төлөвлөж байгаа гэдэгт итгэх шалтгаан юм. Эзлэгдсэн болон эзлэгдээгүй хэсгээр нь манай улсыг хуваахыг хүсэж байна. Өөрөөр хэлбэл Украинд Умард ба Өмнөд Солонгосыг үүсгэх гэж байна. Ямартай ч тэр улс орныг маань бүхэлд нь эзлэх төлөвлөгөөнөөсөө татгалзсан байх” гэж Буданов ярьжээ.
Одоо Оросын зэвсэгт хүчин Мариуполь хотыг эзлэхээр улайран довтолж байгаа нь Крымийн хойгийг Донбассын бүс нутагтай хуурай газраар холбох зорилготой нь тодорхой байгаа.
Гэхдээ Украины зэвсэгт хүчний болон эзлэгдсэн нутгийн ард иргэдийн ширүүн эсэргүүцэл Оросын төлөвлөгөөнд нэлээд саад учруулна гэж төсөөлж байгаагаа Буданов ярьж байна.
Өчигдөр Украины ерөнхийлөгчийн зөвлөх Олексий Арестович ярихдаа “Ойрын хоёр долоо хоногийн хугацаанд Оросын тал Киев, Харьковоос цэргээ татаж, Донбасст төвлөрүүлэх магадлалтай байна” гэсэн нь Будановын таамгийг баталсан юм.
Арестович цааш нь ярихдаа “Тэд одоо гурван зорилго тавиад байна. Нэгд, Донбасс дахь манай цэргүүдийг бүслэх, хоёрт, Мариуполийг эзлэх, гуравт, өмнөд хязгаарыг бүрэн эзлэх. Хэрвээ тэд Херсон хотыг алдвал Мариуполийг эзлэх төлөвлөгөө нь нуран унах болно. Киев, Харьков, Одессыг эзлэх тухай бүр мартана” гэсэн байна.
Бямба гарагт Оросын зэвсэгт хүчин Украины баруун хязгаарын Львов хотод пуужингийн цохилт өгсөн нь хөрш Польш улсад айлчилж байгаа АНУ-ын ерөнхийлөгч Жо Байденд анхааруулга өгөх зорилготой гэж Киевийн эрх баригчид үзэж байгаа юм.
Львов дахь цохилтын бай нь шатахуун нөөцлөх байгууламж, танк, агаараас хамгаалах систем засварладаг үйлдвэр хоёр байжээ.
Пуужинг Крымийн хойгоос харвасныг Украины тал тогтоосон байна. Шатахуун нөөцлөх байгууламжид гарсан галыг цохилтоос хойш 13 цагийн дараа буюу Ням гарагийн өглөө эрт бүрэн унтраажээ.
Эх сурвалж: The Guardian
