Өчигдөр 23:00 цагийн орчимд нийслэлийн Сүхбаатар дүүрэгт гурван явган зорчигч гэмтсэн маш харамсалтай зам тээврийн осол гарсан байна. Тус хэргийн талаар Тээврийн цагдаагийн албанаас тодруулахад, Энэ сарын 28-наас 29-нд шилжих шөнө 23:00 цагийн орчим Сүхбаатар дүүргийн нутаг дэвсгэрт буюу нэгдүгээр хороо, UB mart худалдааны төвийн урд замд зам тээврийн осол гарсан дуудлага ирсэн. Энэ мэдээллийн дагуу хэргийн газрын үзлэг хийж, шалгалтын ажиллагааг явуулж байна.

Ослын нөхцөл байдлыг авч үзэхэд “Приус” маркийн автомашины жолооч үргэлжилсэн цагаан шугам давж эргэснээс “Бенз” маркийн автомашинтай мөргөлдөж улмаар такси барихаар зогсож байсан 3 явган зорчигчийг мөргөж гэмтээсэн нөхцөл байдал урьдчилсан байдлаар илэрсэн. Холбогдогч жолооч нарыг согтууруулах ундааны зүйл хэрэглэсэн эсэх, согтолтын зэргийг шалгахад архи согтууруулах ундааны зүйл хэрэглээгүй нь тогтоогдсон.

Ослын улмаас хүний амь хохироогүй бөгөөд гэмтсэн 3 иргэн эмнэлгийн байгууллагад хүргэгдсэн. Одоогоор мөрдөн шалгах ажиллагаа явагдаж байна” гэв.