ОХУ-ын Гадаад хэргийн сайд С.Лавров Афганистантай хиллэдэг, хөрш улсуудын сайд нарын гуравдугаар бага хуралд оролцохоор БНХАУ-д очоод байна. Украинд цэрэг оруулснаас хойш ОХУ-ын төрийн өндөр албан тушаалтан БНХАУ-д очиж буй анхны тохиолдол гэдгээр нь хэвлэлүүд энэ үйл явдлыг онцолж байна. Учир нь дэлхийн тэргүүлэх гүрнүүдээс ганц БНХАУ ОХУ-ын алхмыг шүүн хэлэлцэхгүй гэсэн байр суурьтай байгаа билээ.
Уг бага хуралд Афганистантай хиллэдэг Пакистан, Иран, Тажикистан, Туркменистан, Узбекистан, БНХАУ улсууд оролцдог. ОХУ Афганистантай хиллэдэггүй боловч С.Лавров уг уулзалтад очжээ. Афганистанд ашиг сонирхлоо хүчтэй илэрхийлдэг АНУ мөн уг хуралд төлөөлөгчөө ирүүлсэн байна. С.Лавров дээрх улсуудын сайд нартай хоёр удаагийн хуралд оролцоно.
БНХАУ-ыг уг уулзалтад Гадаад харилцааны сайд Ван И төлөөлж байгаа бол Афганистаныг төлөөлж мөн Гадаад хэргийн сайд Амир Хан Муттаки ирсэн бөгөөд бүгд оролцох хоёр хурлаас гадна Индонези, Катартай бүс нутгийн тусгаар уулзалтад оролцох төлөвлөгөөтэй байгаа юм.
Дээрх уулзалтуудаас гадна Афганистаны асуудлыг шийдвэрлэхэд голлох нөлөөтэй улсууд болох ОХУ, АНУ, БНХАУ тусгай уулзах аж.
