КИЕВ. /CNN/. Украин, Оросын дараагийн үе шатны хэлэлцээ дөрөвдүгээр сарын 1-нд цахимаар үргэлжилнэ гэж Украины төлөөлөгчдийн тэргүүн Давид Арахамия лхагва гарагт мэдээлжээ.
Д.Арахамиягийн “Telegram” хуудсандаа мэдээлснээр, Туркт энэ долоо хоногт болсон хэлэлцээний үеэр Украины Ерөнхийлөгч Владимир Зеленский, Оросын Ерөнхийлөгч Владимир Путин нарын уулзах цаг ирснийг тэмдэглэсэн байна.
Оросын төлөөлөгчдийн хувьд юун түрүүнд талууд харилцан зөвшөөрсөн гэрээний төсөл хэрэгтэй байгааг тодотгосныг Д.Арахамия уламжилжээ.
Гэхдээ Украины төлөөлөгч дараагийн уулзалтыг хоёр орны ерөнхийлөгч нарын хооронд хийхийг уриалсан байна. Одоогоор хоёр удирдагчийн уулзалтын тов хараахан гараагүй байна.
"Үүний зэрэгцээ бид энэхүү уулзалтыг Орос, Беларусийн нутаг дэвсгэрт хийхгүй байх шаардлага тавьж байгаа" гэж Д.Арахамия хэлжээ.
Э.Хулан
Эх сурвалж: Монцамэ агентлаг
