Чернобылийн атомын цахилгаан станцын орчимд нуувч, хориглолт ухаж байх үедээ цацраг идэвхт бодист хордсон байж болзошгүй шинж илэрсний дараа Оросын цэргүүд тус бүсээс гарч явсныг Украины тал өчигдөр мэдээлжээ.
Станц орчмын үйл ажиллагааг хариуцдаг Энергоатом компанийн мэдээлснээр биеэс нь хордлогын эхний шинж тэмдэг илэрсний дараа цэргүүд яаралтай буцахаар бэлдэж эхэлсэн гэнэ.
Өчигдөр үдээс хойш гэхэд Чернобылийн хориотой бүсэд ганц ч цэрэг үлдээгүйг мэдээлжээ.
Хоёрдугаар сарын 24-нд эзлэн түрэмгийлэл эхлээд удаагүй байхад Чернобылийг Оросын цэргүүд эзлэн авсан юм. Гэхдээ станцын хяналтын үйл ажиллагааг Украины Энергоатом компани үргэлжлүүлэн хариуцаж байв.
“Чернобылийн атомын цахилгаан станц болон хориотой бүс дэх бусад байгууламжуудыг эзлээд байсан цэргүүд хоёр цуваагаар Беларусийн хил рүү хөдөлснийг баталж байна” гэж Энергоатомын мэдэгдэлд өгүүлжээ.
Чернобылийн ойролцоох станцын ажилчдын амьдардаг Славутич хотоос Оросын цэрэг саяхан гарч явсан юм.
НҮБ-ын харьяа Олон Улсын Атомын Эрчим Хүчний Агентлаг (IAEA) Чернобылийн орчмын цацраг идэвхийн нөхцөл байдлыг судлах мэргэжилтнүүдээ илгээхээр болсныг өчигдөр мэдээлсэн байна.
Чернобылийн атомын цахилгаан станцад 1986 онд томоохон осол гарч байв. Тэр үеэс хойш станц орчмын газар нутгийг хориотой бүс болгож, сүйрсэн байгууламжуудаас ялгарах цацраг идэвхийн хэмжээг байнга хянах болсон юм.
Эх сурвалж: Associated Press