Согтууруулах ундааны эргэлтэд хяналт тавих, архидан согтуурахтай тэмцэх тухай хуулийн төсөлтэй холбогдуулан Хууль зүй, дотоод хэргийн сайд Х.Нямбаатар холбогдох албаны хүмүүс согтууруулах ундаа үйлдвэрлэгч, импортлогч нарын төлөөлөлтэй уулзаж, Монгол Улсын Ерөнхийлөгчийн зарлигтай хуулийн төслийг хэрхэн уялдуулах талаар санал солилцсон байна.

Энэ үеэр согтууруулах ундаа үйлдвэрлэгч, импортлогчдод татвар нэмэхгүйгээр онцгой албан татварын таван хувийг Архидан согтуурахтай тэмцэх, урьдчилан сэргийлэх үйл ажиллагааг дэмжих санд төвлөрүүлнэ. Мөн тус хөрөнгөөр согтуурах донтой этгээдийг эмчлэх, тусламж үйлчилгээ үзүүлэх, согтуугаар үйлдэгдэх гэмт хэрэг, зөрчлөөс урьдчилан сэргийлэх, нийгэмд архины хор уршгийн таниулах соён гэгээрүүлэхэд зарцуулах асуудлыг Монгол Улсын Ерөнхийлөгчийн зарлигийн төсөлд тусгуулах саналыг танилцуулжээ.

Уулзалтын үеэр Хууль зүйн байнгын хорооны болон чуулганы нэгдсэн хуралдааны хэлэлцүүлэгт бэлтгэх, санал дүгнэлт боловсруулах үүрэг бүхий ажлын хэсгийн ахлагч УИХ-ын гишүүн Ц.Мөнх-Оргил Согтууруулах ундааны эргэлтэд хяналт тавих, архидан согтуурахтай тэмцэх тухай хуулийн төслийн гол үзэл баримтлал, зарчмын өөрчлөлтийн талаар танилцуулж, аж ахуй нэгж байгууллагын төлөөлөл энэ талаар саналаа хэллээ.

Мөн Ерөнхийлөгчийн Тамгын газрын дарга Я.Содбаатар архидан согтуурахтай тэмцэх, түүний хор уршгийг олон нийтэд таниулан сурталчлах, байгууллагуудын зөв хэрэглээг бий болгох, зэрэг чиглэлээр гарах Монгол Улсын Ерөнхийлөгчийн зарлигийн төслийг танилцуулж, талуудын саналыг сонслоо.

Уулзалтад Ерөнхийлөгчийн зөвлөхүүд, Ерөнхийлөгчийн тамгын газар, УИХ-ын Хууль зүйн байнгын хороо, Сангийн яам, ХЗДХЯ, ХХААХҮЯ, НЗДТГ болон согтууруулах ундаа үйлдвэрлэгч, импортлогч нарын төлөөлөл оролцлоо.