1896 оны 04 сарын 06-ны өдөр Грекийн Афин хотноо эхлэсэн орчин цагийн анхны олимпийн наадмыг 1894 онд Барон Пьер де Кубертиний /Baron de Coubertin/ байгуулсан Олон Улсын Олимпийн Хороо (ОУОХ) /International Olympic Committee/ зохион байгуулжээ. Хорооны анхны ерөнхийлөгчөөр Грекийн бизнесмэн, зохиолч Деметриос Викелас /Demetrios Vikelas/ ажилласан.
1894 оны 06-р сарын 23-нд хуралдсан ОУОХ-ны анхдугаар хурлаар анхдугаар олимпийн наадмыг зохион байгуулах хотоор эртний олимпийн түүхт Афин хотыг санал нэгтэйгээр сонгож байсан бөгөөд уг хот 105 жилийн дараа 2004 оны олимпийг мөн зохион байгуулсан юм. Анхны олимпийн нээлт 04-р сарын 06-ны өдөр Панатенайк цэнгэлдэх хүрээлэнд /Panathenaic Stadium/ болсон бөгөөд улс тус бүрээр эгнэн байрласан тамирчдад хандан зохион байгуулах хорооны дарга Грекийн хааны угсаа залгамжлах хунтайж Константин /Crown Prince Constantine/ үг хэлж, түүний аав нь наадмыг албан ёсоор нээсэн байна. Үүний дараа есөн хамтлаг, 150 найрал дуучид Костис Паламасын /Kostis Palamas/ үг, Спиридон Самарастын /Spyridon Samaras/ ая “Олимпийн дуулал”-ыг /Olympic Hymn/ эгшиглүүлжээ.
1896 оны 04-р сарын 06-15-ны хооронд болсон уг наадамд 14 улсын 241 тамирчин оролцсон бөгөөд бүгд эрэгтэйчүүд байсан. Оролцогчид нь АНУ-ын тамирчдыг эс тооцвол бүгд Европ тивийн улсын иргэн юм уу? Европ тивд амьдардаг хүмүүс байсан нь өнөөгийн олимптой харьцуулахад их л бага хүрээнд болж байсныг илтгэнэ.
Тус наадамд түрүүлсэн тамирчинд мөнгө, дэд байранд зэс медаль /гуравдугаар байр шагналгүй/ өгч байсан бөгөөд хожим ОУОХ медалиудыг алт, мөнгө болгон бүрж гуравдугаар байранд орсон тамирчинд хүрэл медаль нөхөн олгосон юм. Оролцсон 14 орноос 11 нь медаль хүртсэн ба АНУ улс дангаараа 11 алтан медаль хүртсэн бол зохион байгуулагч Грек улс нийт 46 медаль хүртсэнээр медалийн чанараар удаалжээ. Тэгэхдээ нийт тамирчдийн 65 гаруй хувь нь Грекчүүд байсан юм.
Энэ Олимпийн хамгийн гайхалтай тамирчин нь марафонд түрүүлсэн Грек тамирчин Спиридон Луйс /Spyridon Louis/ байсан бол гялалзсан од нь дөрвөн төрөлд алтан медаль хүртсэн Германы бөх, гимнастикч Карл Шухман /Carl Schuhmann/ байжээ.
Олимпийн наадмын санхүүжилтийг босгоход ханхүү Константины ард түмэндээ хандсан уриалгыг дэмжиж цугларсан 330,000 драхам, тусгай шуудангийн маркны багцын борлуулалтын орлогын 400,000 драхам, тасалбарын борлуулалтын 200,000 драхам их нэмэр болсон. Түүнээс гадна ханхүүгийн хүсэлтээр бизнесмэн Жорж Аверофф /George Averoff/ Панатенайк цэнгэлдэхийг сэргээн засварлахад хандивласан 920,000 драхам хамгийн их дэм болсон тул 1896 оны 04-р сарын 05-нд түүний хандивлагчийн хөшөөг цэнгэлдэхийн гадаа байрлуулсан нь одоог хүртэл байдаг аж.
Олимпийн тоглолтын дараа АНУ-ын зүгээс Грекийн хаан Жорж /King George/ болон ОУОХ-ны тэргүүн Кубертин нарт дараагийн олимпийг нутагтаа зохион байгуулах тухай өргөдөл гаргаж байсан боловч 1900 оны олимпийг Парист хийхээр нэгэнт тохирсон байсан тул хүлээж аваагүй юм.
Орчин цагийн олимпийн наадамд Эртний Грекд дөрвөн жил тутамд болдог байсан Зевс бурханд хүдэтгэл үзүүлэх наадмын санааг үргэлжлүүлэн авсан бөгөөд тухайн үедээ Грекийн муж бүрийн эрчүүд цуглан бөх барилдах, уралдах, жад шидэх гэх мэт төрлүүдээр өрсөлддөг байжээ. Энэхүү үйл ажиллагаа МЭӨ 776 оноос эхэлсэн бөгөөд МЭ-ний 363 онд Грекчүүд Ромын засаглалд орсны дараа Христийн шашинд нэгтгэх бодлогын хүрээнд дарангуйлагч 1-р Теодосиус /Theodosius I/ тус наадмыг тэмдэглэхийг хориглосон байдаг.
1896 оны олимпийн тоглолтын хүрээнд хөнгөн атлетик, туялзуур сэлэм, унадаг дугуй, гимнастик, буудлага, усанд сэлэлт, талбайн теннис, хүндийг өргөлт, бөхийн төрлийн тэмцээнүүд явагдсан. Тухайн цаг үедээ хамгийн олон орныг хамарсан, хамгийн олон үзэгчтэй үйл ажиллагаа болж, орчин цагийн олимпизмийн үзлийн бат суурь, амжилттай гараа болж чадсан гэж үздэг.
Олимпийн хаалтын ажиллагаа мягмар гарагт болох байсан ч борооны улмаас хойшилж лхагвад болсон. Грекийн сүлд дуу, Их Британийн тамирчин, эрдэмтэн Жорж С.Робертсоны /George S. Robertson/ эртний грек хэл дээр зохиосон магтаалаар эхлэн, Грекийн хаан Жорж тамирчдын шагналыг гардуулсны дараа олимпийн наадам албан ёсоор өндөрлөж байгааг зарлажээ.
Шигшээ багуудын эрэмбийн тухай ойлголт нь 10 жилийн дараа болох олон улсын наадам хүртэл Олимпийн хөдөлгөөний гол хэсэг биш байсан ч олон эх сурвалжид 1896 оны олимпд оролцогчдын харьяаллыг жагсааж, медалийн тоог гаргасан байдаг. Аль улс хамгийн сайн амжилт үзүүлсэнтэй холбоотой томоохон зөрчилдөөн бий. Олон улсын олимпийн хороо 14 гэсэн тоо өгдөг ч жагсаадаггүй. Энэ нь зарим улсууд олимпийн дараа ОУОХ-ноос хүлээн зөвшөөрөгдсөнтэй холбоотой байх магадлалтай.
Чилийг оруулаагүй /нэг тамирчин гүйлтийн төрөлд бүртгүүлэн олимпд ирсэн ч гараанд гараагүй гэж үздэг/ жагсаалтаар бол 13, Чили, Болгарыг оруулаагүй /Болгар гимнастикын төрөлд нэг тамирчин оруулсан гэж үздэг ч тамирчин Швейцарийн иргэн байсан/ жагсаалтаар бол 12 шигшээ баг оролцсон гэж үздэг. Мөн Чили, Болгарыг оруулсан ч Италийг оруулалгүй /Италийн тамирчинг мэргэжлийн гэж үзэн тэмцээнээс хассан. Буудлагад нэг итали гаралтай тамирчин байсан ч яагаад Италийг төлөөлөөгүй нь тодорхойгүй/ 13 улс жагсаах тохиолдол ч байна. Их Британид олон жил амьдарсны дараа Александрид амьдарч байсан Грекийн иргэн Дионисиос Касдаглис /Dionysios Kasdaglis/ оролцсон тул Египетийг заримдаа жагсаалтад оруулсан байдаг. Бельги, Орос хоёр оролцогчдынхоо нэрсийг оруулсан ч нэрээ татсан байна.
