Даваа гарагт Австри улсын канцлер Карл Нехаммер ОХУ-ын ерөнхийлөгч Владимир Путинтэй уулзсан байна.
Москвагийн ойролцоо Ново-Огарево дахь Путиний амьдардаг өргөөнд болсон уулзалт харьцангуй богино буюу 75 минут үргэлжилжээ.
Канцлер Нехаммер нь Оросын цэрэг Украины газар нутагт халдан довтолсноос хойш Путинтэй нүүр тулж уулзсан Европын Холбооны гишүүн улсын анхны төрийн тэргүүн болж байгаа юм.
“Уулзалт тийм ч найрсаг уур амьсгалтай болсонгүй. Путинтэй маш илэн далангүй, шулуун, хатуу ширүүн яриа өрнүүллээ” гэж Нехаммер уулзалтын дараа мэдэгджээ.
Тэрбээр өнгөрсөн Бямба гарагт Киев хотод айлчилж, Украины ерөнхийлөгч Володимир Зеленскийтэй уулзсан юм.
“Аль аль талдаа хохиролтой, хэн ч ялахгүй дайныг дуусгах ёстой гэсэн анхааруулгыг Путинд хүргэх нь миний хамгийн гол зорилго байлаа. Түүнд үүнийг нэг удаа хэлэх хангалтгүй. Арван удаа хэлэх ч хангалтгүй. 100 удаа хэлэх хэрэгтэй ч байж магадгүй. Гэхдээ энх тайвныг тогтоох, Украины ард түмний аюулгүй байдлыг хангахын тулд шаардлагатай бүхнийг хийх ёстой гэж би бодож байна” гэж Нехаммер мэдэгджээ.
Байгалийн хийн хэрэгцээнийхээ 80 хувийг Оросоос авдаг Австрийн өмнөх засгийн газар Москватай найрсаг харилцаатай байхыг эрхэмлэдэг байсан юм.
Харин Карл Нехаммерын засгийн газар уг хандлагыг үндсээр нь эргүүлж, Украинд эзлэн түрэмгийлэл явуулж буй ОХУ-ыг буруутгаж, Европын Холбооны хориг арга хэмжээг дэмжиж, Оросын дипломатчидыг нутаг дэвсгэрээсээ хөөгөөд байгаа.
Тиймээс канцлерынхаа Путинтэй хийсэн уулзалтад Австрийн улс төрийн хүрээнийхэн нэлээд болгоомжлонгуй хандаж байна.
“Австрийн канцлер Нехаммерын Путинтэй хийсэн уулзалт ярьж байгаагаасаа илүү ач холбогдолтой болсон гэж найдъя. Австри улс өнгөрсөн хугацаанд Москвад ашигтай тэнэгийн үүргийг хангалттай гүйцэтгэсэн” гэж Зальцбургийн Их сургуулийн улс төр судлаач, профессор Райнхард Хайниш твиттер хуудсандаа бичжээ.
Нехаммерын тэргүүлдэг эвслийн засгийн газрын нэг холбоотон болох Ногоон нам Путинтэй хийсэн уулзалтыг таатай хүлээж аваагүй байна.
Тус намын гадаад харилцаа хариуцсан хэвлэлийн төлөөлөгч Эва Эрнст-Дзидзич “Би Путинтэй хийсэн уулзалтыг сайшаахгүй байна. Энэ бол дипломат ажиллагаатай ямар ч холбоогүй арга хэмжээ. Хэлэлцээ хийхэд тохирсон арга зам ч биш. Путин үүнийг суртал нэвтрүүлгийнхээ нэг хэсэг болгоно” гэж твиттер хуудсандаа бичжээ.
Эх сурвалж: Reuters
