Казахстаны харилцаа холбооны монополи компани болох Казахтелекомд тус улсын өмнөх ерөнхийлөгч Нурсултан Назарбаевын зээ их хэмжээний хувьцаа эзэмшдэг юм.
Тэгвэл уг эзэмшлийг нь хурааж авах шийдвэрийг Казахстаны засгийн газар өчигдөр гаргажээ.
Өчигдөр гаргасан албан мэдээнд Казахтелекомын 25 орчим хувийг Скайлайн Инвестмент компаниас хурааж, нийгэмчилснийг дурдсан ч тодорхой тайлбар өгөөгүй байна.
Скайлайн Инвестмент компанийг Назарбаевын зээ хүү Кайрат Сатыбалды үүсгэн байгуулалцаж, удирддаг байжээ.
Сатыбалдыг өнгөрсөн сард нийтийн өмч хөрөнгө шамшигдуулсан, албан тушаалаа хэтрүүлэн ашигласан хэргээр баривчилсан юм.
Өчигдрийн мэдэгдэлд бас Алатау Капитал Инвестмент компанийн эзэмшдэг Казахтелекомын 4 хувийг засгийн газар хураасан тухай мэдээлжээ.
Энэ оны нэгдүгээр сард гарсан эсэргүүцлийн хөдөлгөөн, эмх замбараагүй байдлын дараа Казахстаны ерөнхийлөгч Кассым-Жомарт Токаев эрх мэдлээ улам нэмэгдүүлээд байгаа.
Тэрбээр өмнөх ерөнхийлөгчийн нөлөө, эрх мэдлийг хязгаарлах арга хэмжээг авч эхэлсэн юм.
Одоо 81 настай Назарбаев 2019 онд ерөнхийлөгчийн албан тушаалаа Токаевт шилжүүлж байжээ.
Назарбаевын төрөл төрөгсөд Казахстаны бизнесийн салбар бүрд нөлөөгөө тогтоосон байдаг.
Токаев тэдний эзэмшдэг хөрөнгийг ард түмний тусын тулд зарцуулахаа амлаж байсан юм. Тэр үеэс хойш Назарбаевын үр хүүхэд, хүргэчүүдийг төрийн болон төрийн өмчит компаниудын өндөр албан тушаалуудаас чөлөөлөөд байна.
Эх сурвалж: Radio Free Europe
