Дорноговь аймаг Мандах суманд нэр бүхий компани нүүрсний уурхай барьж, улмаар олборлолт хийх гэж байгааг тус аймгийн иргэд эсэргүүцэн тэмцэж эхэлжээ.
Уг асуудалтай холбоотойгоор Ажлын хэсэг томилсон тухай Байгаль орчин, аялал жуулчлалын сайд Б.Бат-Эрдэнэ өөрийн цахим хуудсаараа дамжуулан мэдэгджээ.
Тэрбээр "Дорноговь аймгийн Мандах суманд үүсээд бай нөхцөл байдалтай холбогдуулан аймгийн Засаг даргатай урьд шөнө ярьж ажлын хэсэг явуулахаар болсон.
Аймгийн Засаг дарга "Захирамж" гаргаж ажлын хэсэг өглөө 05:00 цагт аймгаас гараад одоо Сайхандулаан сум орчимд явж байна. Ажлын хэсгийг Аймгийн мэргэжлийн хяналтын газрын хэлтсийн дарга н.Төмөрбаатар ахалж байгаа ба БОАЖГ, Цагдаа, мэргэжлийн хяналтын албан тушаалтнууд ажлын хэсэгт орсон.
Мөн "Түмэн инвест айл" компанийн захиралтай БОАЖЯ-наас холбогдож, ажлын хэсэг ажиллах хүртэл ямар нэгэн үйл ажиллагаа явуулахгүй байх үүрэг өгсөн.
Хариуцлагатай уул уурхайн эхлэл бол эхлээд нутгийн иргэдэд тухайн төслийн үр өгөөж , байгалийн нөхөн сэргээлт, нутгийн унаган иргэдэд ямар ашиг тустай байх талаар урьдчилан ярилцаж хэзээ бүрэн ойлголцолд хүрсэн үед үйл ажиллаагаа эхлүүлэх ёстой. Эс ойлголцвол техник оруулах, хүч хэрэглэхийг хориглодог" гэжээ.
Бид тус аймгийн БОАЖГ-ын дарга Д.Сүрэнтэй холбогдож, үүссэн нөхцөл байдлын талаар тодруулахад "Ажлын хэсэг гаран ажиллаж байгаа тул мэдээлэл өгөх боломжгүй" хэмээн хариулсан юм.
