Даваа гарагт эрх баригч намын бүлгийнхэн өдөржин хуралдсан. Ингэхдээ хаалттай хаалганы цаана, нарийн ширийн зүйлээ ярьж ходоод хагаравч тогоон дотроо гэдгийн жишгээр болж бүтэхгүй байгаа бүхнээ буруутантай нь хамт ярьсан юм байх. Буруу бүхний бурантгийг УИХ руу чиглүүллээ гэх гэм зэм ч бас байсан гэлцэнэ.
Зарим эх сурвалжийн мэдээлж буйгаар энэ үеэр Засгийн газарт хаяглаж хандсан хатуухан хариу сануулга ч цөөнгүй байсан бололтой юм. Тухайлбал, УИХ-ын зарим гишүүд ийм байдлаар асуудал ярих гэж буй бол ажлаа хийж чадахгүй байгаа Засгийн газрын гишүүн, сайд нарын асуудлыг ярих болно гэж Засгаа айлгах, анхааруулахын дундуур хэлжээ.
Ингэхдээ ажлаа хийж чадахгүй байгаа сайд гэдэгт хамгийн түрүүнд Л.Халтар тэргүүтэй хэд хэдэн сайдын нэрс онцлон дурдагдсан гэх. Нөгөө хүүхэд айлгадаг “хадны мангаа” гэдэг шиг УИХ нь Засгийн газраа Л.Халтар тэргүүтнээр айлгадаг болсон юм шиг байна.
Муу ажиллаж байгаа гэх баримт факт Л.Халтар сайдын хариуцсан зам тээврийн салбарт захаас аван байдаг болохоор гишүүдийн хувьд бэлэн зэлэн жишээ болдог нь тодорхой. Адаглаад бүтэн дөрвөн жил ярьж байгаа Дарханы зам гэж буруу өдрөө эхэлсэн дуусдаггүй бүтээн байгуулалт бий. МАН-ын нүүрийг тахлах тооцоотой эхэлсэн энэ зам эдүгээ МАН-ын нүүрийг улалзуулдаг болсон.
Л.Халтар сайдыг дан ганц Дарханы замаар барьцаалж шүүмжлээд байгаа юм биш. Сайдын хамар доорх нэгж нь болох Авто тээврийн үндэсний төв гэж авилга баривчилгаагаараа танигдсан байгууллага бий. Төр засаг нь хэмнэе гэж байхад “Тэргүүний ажилтны тэмдэг” хийлгэнэ гээд 25 саяын тендер зарлаад сөрж байдаг мэдрэмжгүй гарууд.
Үргэлжлүүлээд төмөр замын салбар дахь бүтэлгүйтэл сайдынхаа нэр хүндийг шороотой хутгасаар ирлээ. Байсхийж байгаад л аваар осол гардаг.
Тавантолйгой-Зүүнбаян чиглэлийн зам дээр вагон унасан аваар гараад удаагүй байтал араас нь УБТЗ-ын ложистикийн талбай дээр хэдэн тэрбумын үнэтэй чингэлэг өргөгч буюу калмар шатав.
Зам тээврийн салбарын бүтэлгүйтэл энэ мэтчилэн үргэлжилсээр байна. Ийм байхад салбарын сайдын нэр нь яригдаж, Засгийн газрыг ганхуулах барьц болгохгүй гээд ч яалтай билээ.
Л.Оюун-Эрдэнийн Засгийн газар “хоолойд тээглэсэн яснаасаа” салж чадахгүй хадгалж хамгаалаад байгаа нь мөнөөх давхар дээлийн далбаан дор нэг мөр шийдэх гэсэн хүлээлт байж болох юм.
Гэвч тэр болтол тэснэ гэхэд хэцүү, улсын ажлын эрх ашиг гээгдэж хаягдах аюул бас байна. Хадгалж хамгаалаад байя гэтэл Засгийн газраа муухай харагдуулаад, Г.Дамдиннямаас эхлээд УИХ-ын гишүүд сав л хийвэл Дарханы замаар нь далайлгаж Л.Оюун-Эрдэнийн танхимыг Л.Халтартай нь хамт хамж ганхуулж гунхуулахчих гээд байдаг, хэцүү юм даа.
Г.Хан
Эх сурвалж: Toim.mn
