-АНУ Украинд нийт 800 сая ам.долларын үнэ өртөг бүхий зэвсэг олгохоо мэдэгдэв. Үүний дотор Вашингтон Киев рүү хуягт тээвэрлэгч, гаубиц, Ми-17 нисдэг тэрэг илгээнэ гэж амласан байна.
-Польш, Литва, Латви, Эстони гэсэн дөрвөн улсын Ерөнхийлөгч Киевт нэг дор айлчлав. Тэд Владимир Зеленскийтэй хэлэлцээ хийж, Оросын эзлэн түрэмгийллийн үед ихээхэн сүйдсэн Украины нийслэлээс холгүй орших Бородянка хотод зочилсон байна.
-Оросын арми ухарсаны дараа амиа алдсан энгийн иргэд олноор олдсон Буча хотод Гааг дахь Олон улсын эрүүгийн шүүхийн прокурор Карим Хан зочиллоо. Украин бүхэлдээ гэмт хэргийн талбар болсон гэж тэр мэдэгдэв.
-ЕАБХАБ мөн ОХУ дайны гэмт хэрэг үйлдсэн байж болзошгүйг зарлав.
-Украины мянга гаруй цэрэг Мариупольд бууж өгсөн гэж Оросын тал мэдэгдэв. Харин Украин эдгээр мэдээллийг няцааж, хотын төлөөх тэмцэл үргэлжилж байгааг онцлон тэмдэглэв.
-Оросын армийн төлөөлөгчид хэрэв Украины арми Оросын нутаг дэвсгэр дээрх бай газруудад цохилт өгөх юм бол "шийдвэр гаргах төвүүд", тэр дундаа Киевт цохилт өгнө гэж сүрдүүлэв.
-АНУ-ын Ерөнхийлөгч Жо Байден Украинд болж буй үйл явдлыг геноцид гэж нэрлэсэн ч Францын удирдагч Эммануэль Макрон ийм үнэлгээ өгөхөөс татгалзаж, Украин, Оросын ард түмэн "ахан дүүс" гэж мэдэгдэв.
