ЛОНДОН. /TASS/. Их Британийн эрх баригчид дөрөвдүгээр сарын 14 буюу өнөөдрөөс ОХУ-аас ган, төмөр импортлохыг хориглож, дэвшилтэт технологийн зарим салбарын бүтээгдэхүүн нийлүүлэхээ зогсоох шийдвэр гаргасныг тус улсын Гадаад хэргийн сайд Лиз Трасс лхагва гарагт мэдэгджээ.
"Маргаашнаас бид Оросын төмөр, гангийн импортыг хориглохоос гадна квант технологи, дэвшилтэт материал экспортлохыг хориглоно" гэж сайд мэдэгдсэн байна.
Оросын гангийн бүтээгдэхүүний импортод хориг тавина гэдгээ Их Британийн Засгийн газар дөрөвдүгээр сарын 6-нд зарлажээ. Их Британийн зах зээл дээр цувисан металл бүтээгдэхүүний хомсдол үүсэхгүйн тулд Орос, Беларусийн гангийн импортын квотыг дахин хуваарилах журмыг мөн энэ өдөр эхлүүлсэн байна. Беларусь, ОХУ-ын үйлдвэрлэгчдийг сонгох боломжгүй квотыг бусад орны экспортлогчдод хуваарилах юм. Хязгаарлалттай холбоотойгоор Лондон халуун цувисан ган хуудас, тууз болон ган арматур гэсэн хоёр төрлийн бүтээгдэхүүний хомсдолд орох вий гэж болгоомжилж байгаа аж.
Д.Жаргал
Эх сурвалж: Монцамэ агентлаг
