Энэ долоо хоногт Украины нууц албаныхан тус улсын сөрөг хүчний улс төрч, эрэн сурвалжлагдаж байсан Виктор Медведчукийг баривчилснаа зарласан билээ.
Медведчук нь Москвагийн талыг баримтлагч улс төрийн намыг тэргүүлдэг байсан юм. Өнгөрсөн онд тэр эх орноосоо урвасан хэрэгт шалгагдаж, гэрийн хорионд байжээ.
Хоёрдугаар сарын 24-ний өдөр Оросын цэрэг Украинд халдан довтолсны дараа Медведчук гэрийн хорионоос оргосон юм.
Украины ерөнхийлөгч Володимир Зеленский түүнийг өөрийн олзлогдсон цэргүүдээр солилцох саналыг ОХУ-д тавьсан ч хүлээж аваагүй байна.
Медведчук бол Оростой газрын тосны бизнес хийж, баяжсан хүн юм.
Тэрбээр ОХУ-ын ерөнхийлөгчтэй ойр дотно харилцаатай, бага охиныг нь Путин загалмайлж байжээ.
Кремлийн эрх баригчид Зеленскийн засгийн газрыг түлхэн унагасныхаа дараа Медведчукийг төрийн эрхэнд гаргах төлөвлөгөөтэй байсан гэсэн яриа бий.
Түүний хөрөнгийн хэмжээг Форбс сэтгүүл $620 сая гэж тооцоолсон байдаг.
Өчигдөр Украины засгийн газар Медведчукийн нийт 154 хөрөнгийг хурааж авснаа мэдээлсэн байна. Үүнд 23 амины орон сууц, 32 нийтийн орон сууц, 30 эзэмшил газар, 26 автомашин, нэг дарвуулт завь багтжээ.
Энэ долоо хоногийн эхээр Медведчукийн $200 саяын үнэтэй хувийн хөлөг онгоцыг Хорват улсын боомтоос хураасан тухай Украины албаныхан мэдээлж байсан юм.
Эх сурвалж: Business Insider