БЕРЛИН. /Reuters/. Германчууд Оросын хий, нефтиэс хараат бус болохын тулд эрчим хүчээ хэмнэж эхлэх хэрэгтэй гэж Германы Эдийн засгийн сайд Роберт Хабек хэлжээ. Европт эдийн засгаараа тэргүүлэгч тус улс нь Украины дайны хариу арга хэмжээний хүрээнд Москвагийн хий, нефтийн импортоо бууруулах арга замыг эрэлхийлж байгаа юм.
Украинд энгийн иргэдийн амь нас эрсдэж байгаа энэ үед шүүмжлэгчид Оросын байгалийн хий, нефтийн орлого нь Москвагийн хувьд дайн хийхэд амин чухал санхүүжилт болж байгаа гэж үзэж байгаа аж. Р.Хабекийн хэлснээр, иргэд галт тэргээр зорчих, унадаг дугуй унах зэргээр эрчим хүчний хэрэглээгээ бууруулж чадвал Герман улс илүү хараат бус болох боломжтой байна.
“Автомашинаар зорчихгүйгээр хэмнэсэн километр бүр Оросын эрчим хүчний хангамжаас хамааралтай байдлыг бууруулахад хувь нэмрээ оруулна” гэж Р.Хабек “Funke” группт ярилцлага өгөх үеэрээ ярьсан байна. Ингэх нь хүрээлэн буй орчноо хамгаалахад ч мөн тус дөхөм болно гэдгийг тэрбээр нэмж хэлжээ.
Эдийн засгийн сайдын ярьснаар, хувь хүний эрчим хүчний хэрэглээг 10 хувиар бууруулах боломжтойгоос гадна ажил олгогчид ажилтнууддаа боломжтой тохиолдолд гэрээсээ ажиллах нөхцөлийг санал болгосноор мөн гар бие оролцох бололцоотой байна. Тухайлбал, боломжтой тохиолдолд ажилтнууд долоо хоногт нэг юм уу хоёр өдөрт гэрээсээ ажиллаж болно гэж тэрбээр хэлжээ.
Э.Хулан
Эх сурвалж: "Монцамэ" агентлаг
