50 хоногийн турш бүслэлтэд байгаа Азовын тэнгисийн боомт хот Мариуполийн гангийн үйлдвэр Украины цэргүүдийн сүүлчийн түшиц газар болоод байна.
Азовстал үйлдвэр нь 11 км.кв талбай эзэлдэг томоохон байгууламж юм.
ОХУ-ын батлан хамгаалах яам үйлдвэрт байгаа Украины цэргүүдэд үд дундаас өмнө зэвсгээ хаян бууж өгөх шаардлагыг Ням гарагийн өглөө тавьсан байна.
Гэвч Украины цэргүүд бууж өгөхөөс татгалзжээ. Мариуполь хотыг бүрэн эзэлж чадвал энэ нь Оросын эзэлсэн анхны томоохон хот болох юм.
Украины талын тооцоолсноор бүслэлтийн үеэр тус хотын 21,000 орчим иргэн амиа алджээ. Тасралтгүй бөмбөгдүүлсэн хотод одоо бүтэн барилга байшин бараг үлдээгүй юм.
Дайнаас өмнө Мариуполь хот 450,000 оршин суугчтай байснаас одоо бүслэлтэд 100,000 орчим нь үлдсэн байна.
Тэд ямар ч хоол хүнс, ундны ус, гэрэл цахилгаангүй хүнд нөхцөлд амьдарч байгаа.
“Эсэргүүцлээ үргэлжлүүлсэн бүгдийг устгах болно” гэж бууж өгөх шаардлагыг зарлахдаа ОХУ-ын батлан хамгаалах яамны хэвлэлийн төлөөлөгч Игорь Конашенков хэлжээ.
Украины батлан хамгаалахын дэд сайд Ханна Маляр “Украиныг хамгаалж буй бамбай” гэж Мариуполь хотыг тодорхойлсон байна.
Учир нь Мариуполийг эзэлсний дараа Оросын цэрэг Донбассын бүс нутгийг бүрэн эзлэх байлдааны ажиллагаагаа үргэлжлүүлэх юм.
Энэ бүсийн Донецк, Луганск мужуудын зарим хэсэг одоо Оросын дэмжлэгтэй салан тусгаарлагчдын хяналтад байгаа.
Мариуполийг эзэлсэн тохиолдолд Орос улс Украинаас салан тусгаарласан Донбассын бүсийг 2014 онд өөртөө нэгтгэсэн Крымийн хойгтой хуурай газраар холбож чадах юм. Энэ нь ОХУ-ын ерөнхийлөгч Владимир Путинд маш их хэрэгтэй байгаа ялалт болох ажээ.
Эх сурвалж: Associated Press
