Украины Агаарын довтолгооноос хамгаалах албаны офицер агаарын орон зайг хянах талаар ВВС-д өгсөн ярицлагын онцлох ишлэлүүдийг хүргэж байна.
Түүнтэй баазынх нь видео линкээр дамжуулан ярилцсан бөгөөд тэрээр хаана байрлаж байгаагаа нь харин хэлсэнгүй.
Ирэх долоо хоногт ямар ч амралт байхгүй гэдгийг тэр мэдэж байгаа. Оросуудын Киевийг эзлэх оролдлого бүтэлгүйтсэн байж болох ч одоо гол хүчнүүд нь Донбасст шилжиж, дайны дараагийн шат эхэлж байгаа энэ үед “Днепр” зенит-пуужингийн бригадын дайчид гол үүрэг гүйцэтгэх болно.
Оросын дайралтаас Украины агаарын орон зайг хамгаалах нь хэцүү ажил. "Бид улсынхаа бүх агаарын орон зайг хааж чадахгүй" гэж ахмад Кравчук хэлэв. Тэр тусмаа дайны эхний өдрүүдэд агаарын довтолгооноос хамгаалах олон байгууламж бүрэн болон хэсэгчлэн устгагдсан.
Украины арми байлдааны ажиллагааны эхний шатанд их хэмжээний хохирол амссан гэдгээ хүлээн зөвшөөрдөггүй. Хэдийгээр алдагдал хүлээсэн ч бүрэн бүтэн үлдсэн агаарын довтолгооноос хамгаалах системүүд үр дүнтэй ажиллаж байна.
Цэргийн шинжээчдийн байр суурийг нийтэлдэг сайт "Украин Оросын онгоц, нисдэг тэрэг, нисгэгчгүй онгоц зэрэг агаарын зэвсэглэлээс дор хаяж 82-ыг устгасан, гэмтээсэн эсвэл олзолсон" гэж мэдээлжээ. Харин Украины агаарын зэвсэглэлийн алдагдал 33 нэгж байна гэв.
Оросын агаарын зэвсэгт хүчин Украиныхаас гурав дахин олон байлдааны нисэх онгоц байршуулсан юм. Оросын нисэх хүчин өдөрт 250 орчим нислэг үйлдэж, 30 орчим агаарын цохилт хийсэн гэж Пентагон мэдээлэв. Өрнөдийн шинжээчид Оросыг агаарын бүрэн давуу байдалд хүрэхийн төлөө тэмцэж байна гэж мэдэгдсээр байна.
Үндсэндээ шинэ МиГ-29 сөнөөгч онгоцуудаас бүрдэх Украины Агаарын цэргийн хүчин өдөрт хамгийн ихдээ 10 орчим байлдааны ажиллагаа явуулж байна. Энэ нь, мэдээж хэрэг Оросын нисэх онгоцыг эсэргүүцэхэд учир дутагдалтай байгаа.
Оросын арми агаарын орон зайд давуу талтай гэдгийг ойлгож байсан учраас Украин барууны орнуудад хандан тус улсын агаарын орон зайг хаахыг хүсч байсан юм.
Тус бүс нутаг Оросын хяналтад байдаг агаарын орон зайд ойр оршдог тул Оросын нисэх онгоцууд Донбассын дээгүүр илүү чөлөөтэй нисэх боломжтой гэж Хатан хааны нэгдсэн зэвсгийн хүрээлэнгийн ахлах ажилтан Жастин Бронк мэдэгдэв.
Энэ дайнд ялахын тулд олон түвшний хамгаалалт гэж нэрлэгддэг алсын, дунд, ойрын тусгалын зэвсэг Украинд нэн шаардлагтай. Барууны орнууд тус улсад ойрын зайн тусгалтай газар-агаар ангиллын пуужин нийлүүлдэг. АНУ л гэхэд Украин руу 2000 Стингер илгээсэн байна. Их Британи мөн Украинд өндөр хурдны Starstreak зенитийн пуужин нийлүүлсэн бөгөөд яг хэд гэдэг нь тодорхойгүй байна.
"Одоо бидэнд дунд болон холын тусгалын агаарын довтолгооноос хамгаалах систем дутагдаж байна" гэж Кравчук ВВС-д ярьжээ.
Хэдийгээр байлдааны ажиллагаа Украины зүүн хэсэг рүү шилжсэн ч тус улсын бусад бүс нутгийг хамгаалах шаардлагатай хэвээр байна. Украин сүүлийн үед зүүн зүг рүү агаарын довтолгооноос эсэргүүцэн хамгаалах нэмэлт зэвсэглэл илгээсэн. Гэсэн хэдий ч агаарын довтолгооноос хамгаалах бүх системийг Донбасст шилжүүлэх боломжгүй юм.
Украин Оросын нисэх онгоц төдийгүй далавчит болон баллистик пуужингуудыг устгахын тулд агаарын довтолгооноос хамгаалах системээ ашиглахаас өөр аргагүй. Амжилттай байгаа ч бүгдийг унагах боломжгүй.
Кравчукийн тооцоолсноор түүний анги Оросын алсын тусгалтай пуужингийн 50-70 хувийг устгадаг. Тухайлбал, түүний хэлснээр, Орос саяхан Днепр рүү зургаан пуужин харваснаас дөрвийг нь устгасан гэжээ.
Дайн эхэлснээс хойш Орос 1550 пуужин харвасан гэж Пентагон мэдээлэв. Орос бас хэт авианы пуужин ашигладаг гэж мэдэгджээ.
Хатуу үнэн бол илүү хүчирхэг цэргийн дэмжлэггүйгээр Украин Оросын агаарын болон пуужингийн цохилтоос хамгаалахад улам хэцүү болно.
Ахмад Кравчук хэлэхдээ: "Агаарт ноёрхсон тал дайнд ялдаг гэдгийг өнгөрсөн дайнууд харуулсан" Гэжээ.
Эх сурвалж: ВВС
