Европын нэгдэл нягтралыг дэмжигч, центрист үзэлт Эммануэл Макрон өчигдөр болсон Франц улсын ерөнхийлөгчийн сонгуульд ялалт байгууллаа.
Түүний өрсөлдөгч нь хэт барууны үзэлт Марин Ле Пэн байсан юм.
Саналын хуудасны 95 хувийг тоолсны дараах байдлаар Макрон 57, Ле Пэн 43 хувийн санал авсан байна.
Эйфелийн цамхгийн дэргэд ялалтаа зарлаж хэлсэн үгэндээ Макрон хуваагдсан нийгмийг эвлэрүүлж, францчуудын нэгдэл нягтралыг хангахаа амлажээ.
Таван жилийн өмнө болсон сонгуулиар Макрон 66 хувийн саналаар Ле Пэнийг ялж байсан юм. Хэт барууны сөрөг хүчин энэ сонгуульд түүхэндээ байгаагүй өндөр санал авсан байна.
Сонгуулийн ирц 72 хувьтай байсан нь 1969 оны сонгуулиас хойших хамгийн бага ирц болжээ. Бас саналын хуудасны 28 хувь нь хоосон буюу хүчингүйд тооцогджээ.
Энэ нь сонгогчдын нэлээд хэсгийн хувьд хүссэн нэр дэвшигч нь байгаагүйтэй холбоотой.
Ле Пэний хувьд цагаачлалын хатуу бодлого баримтлах, уугуул франц хүмүүсийн аж амьдрал, эдийн засгийн нөхцөлийг нэн тэргүүнд тавих амлалт өгч байв. Макрон өрсөлдөгчийнхөө намыг ОХУ-ын ерөнхийлөгч Владимир Путинээс хамааралтай, 2014 онд Оросоос зээл авч байсан зэргийг сонгуулийн сурталчилгааныхаа үеэр шүүмжилж байлаа.
Тиймээс Украинд дайн өрнөж буй эгзэгтэй цаг үед Ле Пэнийг дэмжихгүй байхыг сонгогчдод уриалж байжээ.
Европын Холбооны томоохон гишүүн оронд хэт барууны үзэлтэн ерөнхийлөгч болохоос Брюсселийн эрх баригчид болгоомжилж байв.
Тиймээс Макроны ялалтыг Европын Холбооны удирдлагууд талархан хүлээж авчээ.
Европын Зөвлөлийн ерөнхийлөгч Шарль Мишел “Браво Эммануэл. Энэ ороо бусгаа цаг үед бидэнд нэгдмэл Европ хэрэгтэй. Франц улс илүү бие даасан, илүү стратегийн ач холбогдолтой Европын Холбоонд үнэнч байгаагаа харууллаа” гэж твиттер хуудсандаа бичсэн байна.
Германы канцлер Олаф Шольц мэдэгдэлдээ Францын сонгогчид “Европын талд байгаагаа хүчтэй илэрхийллээ” хэмээн сайшаажээ.
Одоо ирэх зургаадугаар сард болох парламентын сонгуульд Францын улс төрийн намууд анхаарлаа хандуулж байна. Энэ сонгуулиар Макроны центрист эвсэл олонхын байр сууриа хадгалахын төлөө өрсөлдөх юм. Макронд ойрын үед тулгараад байгаа гол асуудал нь эрчим хүчний үнийн өсөлтөөс хамааралтай иргэдийн нуруун дээр хүнд ачаа болж буй эдийн засгийн дарамтыг бууруулах болоод байна.
Эх сурвалж: The Guardian