-Украины Ерөнхийлөгч Владимир Зеленский хэлсэн үгэндээ Орос улс эрчим хүчний нөөцөө ашиглан Европыг шантаажилж байна гэж мэдэгдэв. Түүний хэлснээр, Москва Польш, Болгарт байгалийн хийн нийлүүлэлтээ зогсоох шийдвэр гаргасан нь Европ Оростой эдийн засгийн хэвийн хамтын ажиллагаанд найдаж болохгүйг тодорхой харуулж байна.
-Украинд дайн эхэлснээс хойшхи хоёр сарын хугацаанд ЕХ-ны орнуудад чулуун нүүрс худалдсан орлогоо ОХУ хоёр дахин нэмэгдүүлсэн байна. Ерөнхий зургаараа борлуулалт буурсан ч эрчим хүчний үнийн өсөлт нь Москвад 62 тэрбум евро авчирсан байна. Гол худалдан авагч нь Герман улс хэвээр байна. Энэ тухай Финляндын Эрчим хүч, цэвэр агаар судлалын төвийн мэдээлжээ.
-Их Британийн Гадаад хэргийн сайд Лиз Трасс Оросын цэргүүдийг Украины эзэлсэн бүх нутаг дэвсгэрээс, тэр дундаа Крымээс гаргах ёстой гэж мэдэгдэв. Түүний хэлснээр, барууны орнууд ирээдүйд ийм түрэмгийлэл давтагдахгүйн тулд эдийн засгийн хүчээ чиглүүлэх шаардлагатай байна.
-Донецкийн ойролцоо бууж өгөхийг завдсан украинчуудыг Оросын арми буудсан гэх найдвартай мэдээлэл АНУ-д бий. "Хэрэв эдгээр баримтууд батлагдвал дайн байлдааны зарчмыг үндсээр нь зөрчсөн хэрэг болно" гэж НҮБ дахь АНУ-ын төлөөлөгч мэдэгдэв. Ийм гэмт хэргийг зөвшөөрч, өөгшүүлж байгаа хүмүүс хуулийн дагуу хариуцлага хүлээх болно гэж тэр анхаарууллаа.
-Канадын парламент Оросын Украинд хийж буй үйлдлийг буруушааж, түүнийг геноцид гэж тодорхойлсон. Хууль тогтоогчид Оросын цэргийн хүчнийхэн хүн төрөлхтний эсрэг үйлдсэн системтэй, өргөн хүрээтэй дайны гэмт хэргийн тодорхой бөгөөд хүчтэй нотолгоо байгаа гэж дүгнэжээ.
-Майкрософт компанийн тайлангаас харахад Оросын эрх баригчдын дэмжлэгээр үйл ажиллагаа явуулдаг хакерууд Украинд тусгай ажиллагаа эхэлснээс хойш 37 удаа кибер халдлага үйлдсэн байна. Тус компанийн судлаачдын үзэж байгаагаар, Украинд дайралт эхлэхээс бүр жилийн өмнө кибер атак эхэлсэн гэжээ.
Түүнээс гадна:
-Украины армийн анги нэгтгэлүүд Херсон мужийн Николаевка чиглэлд Оросын цэргүүдийн довтолгооны бэлтгэлийг тасалдууллаа гэж Украины цэргийн командлал мэдэгдэв.
-Оросын армид эзлэгдсэн Херсон хотод шөнө хэд хэдэн дэлбэрэлт сонсогдов. Украины цохилтын бай нь 4-р сарын 20-ноос хойш Оросын телевизийн нэвтрүүлгүүдийг цацаж байгаа телевизийн цамхаг болсон гэж Оросын төрийн хэвлэлүүд мэдээлж байна. Харин Украины тал эдгээр мессежийн талаар хараахан тайлбар хийгээгүй байна.
-Оросын Белгород хотод хэд хэдэн дэлбэрэлт болов. Тус хотод агаарын довтолгооноос хамгаалах систем ажиллаж байсан гэж орон нутгийн эрх баригчид мэдээлэв. Орой нь Украины Ерөнхийлөгчийн Тамгын газрын даргын зөвлөх Михаил Подоляк ойрын долоо хоногт ОХУ-ын хилийн бүс нутгуудыг "цэрэггүйжүүлэх" үйл явц эрс нэмэгдэнэ гэж мэдэгдэв.
Эх сурвалж:ВВС