Өнгөрсөн долоо хоногт Монгол Улс ОХУ-ын алс дорнодын Владивосток хотод худалдааны төлөөлөгчийн газраа нээсэн тухай албаны эх сурвалж мэдээлсэн билээ.
Үүнийгээ Монголын бараа бүтээгдэхүүнийг Ази, Номхон далайн зах зээлд гаргах зорилготой алхам хэмээн тайлбарлаж байв.
Харин уг үйл явдалтай зэрэгцэн Оросын өдөр тутмын “Ведомости” сонинд ““Монгольская смесь” может позволит России обойти западные санкции” гэсэн гарчигтай мэдээ нийтлэгджээ.
Энэ нь ““Монголын холимог” өрнөдийн хоригийг давахад Орост туслах боломжтой” гэсэн утгатай.
Уг нийтлэлд Украинд дайн өдөөсөнтэй холбогдуулан өрнөдийн орнуудын авсан хориг арга хэмжээнд хязгаарлагдалгүйгээр Оросын нүүрсийг хэрхэн гадаад зах зээлд экспортлох аргын тухай бичжээ.
Ингэхдээ “Монголын холимог” хэмээх аргыг хэрэглэх санал дэвшүүлсэн байна. Энэ нь төмөр замаар тээвэрлэгдэн Владивостокт ирсэн Монголын нүүрсийг Оросын нүүрстэй хольж, эх үүсвэрээ “Монгол” болгох арга юм байна.
Ингэвэл Оросын нүүрсийг Ази, Номхон далайн зах зээлд чөлөөтэй гаргах боломжтой гэжээ.
Энэ тухай тайлбарлахдаа Shell компанийн “Латвийн холимог” гэгддэг байсан аргыг жишээ болгон дурдсан байна. Эрчим хүчний томоохон компани Shell уг аргыг хэрэглэн Оросын газрын тосыг Европын зах зээлд гаргадаг байжээ.
Ингэхдээ Shell компани Оросоос авсан газрын тосыг 49.99 хувь, бусад эх үүсвэрээс авсан тосоо 50.01 хувиар хольсноор өөр улсын нэрээр гаргах боломжтой болж байсан гэнэ.
Ингэж холих ажлаа Латвийн Вентспилс боомт хот дахь газрын тос боловсруулах үйлдвэрт хийдэг байсан тул албан бусаар “Латвийн холимог” хэмээн нэрлэж байжээ.
Сүүлд Shell компани ийм арга хэрэглэн Оросын газрын тосыг Европт нийлүүлж байснаа хүлээн зөвшөөрөөд уучлал гуйж байсан байна.
Энэ тухай Блүүмбэрг агентлаг тухайн үед мэдээлж байжээ.
Эх сурвалж: Ведомости, Bloomberg