Ням гарагт ОХУ-ын гадаад хэргийн сайд Сергей Лавров гадаадын хэвлэлд ярилцлага өгөхдөө Нацистуудын удирдагч Адольф Хитлерийг жүүд хүн байсан тухай ярьсан юм.
Тэрбээр жүүд ерөнхийлөгчтэй Украиныг “нацизмаас чөлөөлөх” болсон шалтгааныг тайлбарлахдаа ингэж хэлжээ.
Лавровын хэлсэн үгийг Израилын засгийн газар хүчтэй эсэргүүцэж, албан ёсоор уучлал гуйхыг шаардаж байв.
Мягмар гарагт ОХУ-ын гадаад хэргийн яам гаргасан мэдэгдэлдээ уучлал гуйгаагүй бөгөөд харин Израилын эрх баригчдыг нео-нацизмыг дэмжигч хэмээн хариу шүүмжилсэн юм.
“Киевийн нео-нацист дэглэмийг яагаад дэмжиж байгаагаа Израилын засгийн газар тайлбарлах хэрэгтэй” гэж уг мэдэгдэлд өгүүлжээ.
Тэгвэл Пүрэв гарагт Израилын ерөнхий сайд Нафтали Беннеттэй утсаар ярихдаа ОХУ-ын ерөнхийлөгч Владимир Путин гадаад хэргийн сайдынхаа өмнөөс уучлал гуйсан байна.
“Лавровын мэдэгдлийн төлөө ерөнхийлөгч Путин уучлал гуйсныг ерөнхий сайд хүлээн авч, жүүд хүмүүс болон Холокостын түүхэнд хандах хандлагаа тодруулсанд нь талархал илэрхийллээ” гэж Нафтали Беннетийн хэвлэлийн алба мэдэгджээ.
Харин Беннет, Путин нарын ярианы тухай Кремлиэс гаргасан мэдэгдэлд уучлал гуйсан тухай огт дурдаагүй байна.
Удирдагчид утсаар ярихдаа Холокостын түүхэн үнэний талаар хэлэлцсэн тухай зөвхөн дурджээ.
Оросын зэвсэгт хүчин Украинд халдан довтолсноос хойш Израил улс дайтагч талуудтай тэнцвэртэй харилцах бодлого баримталж байгаа. Тус улс Украинд хүмүүнлэгийн тусламж үзүүлж, талуудыг энхийн гэрээ байгуулахад зуучлахыг хичээж байна.
Нөгөө талаар Израил улс Оросын эсрэг олон улсын эдийн засгийн хоригт нэгдээгүй байгаа юм.
Сирийн асуудлыг шийдэхэд Москватай хамтран ажиллах ашиг сонирхол нь ийм бодлого баримтлахад хүргэж байгаа гэж ажиглагчид дүгнэдэг.
Украинд дайн эхэлснээс хойш 6,000 гаруй Оросын жүүд дүрвэж ирснийг Израилын цагаачлалын яам өнгөрсөн сард мэдэгдэж байв.
Эх сурвалж: AFP
