Дайн эхэлсэн хоёр сар гаруй хугацаанд Оросын армийн 12 генерал алагдсаныг Украины засгийн газар мэдээлж байгаа.
Тэгвэл үүнд нь АНУ-аас өгсөн тагнуулын мэдээлэл тус болж буй тухай Нью-Йорк Таймс сонин өчигдөр албаны эх сурвалжуудаас уламжлан мэдээлжээ.
Харин АНУ-ын Үндэсний Аюулгүй Байдлын Зөвлөл уг мэдээллийг эрс няцаасан байна.
“Украинчуудыг газар нутгаа хамгаалахад нь АНУ тагнуулын мэдээллээр хангаж байгаа нь үнэн. Гэхдээ манай өгсөн мэдээлэл Оросын генералуудын амийг хөнөөхөд огт чиглэгдээгүй” гэж Үндэсний Аюулгүй Байдлын Зөвлөлийн хэвлэлийн төлөөлөгч Адриан Уатсон мэдэгджээ.
Энэ асуудлаар Пентагон байр сууриа илэрхийлээгүй байна.
ОХУ-ын зэвсэгт хүчний жанжин штабын дарга, генерал Валерий Герасимов өнгөрсөн долоо хоногт Донбассын фронт дээр өөрийн биеэр очиж, нөхцөл байдалтай танилцсан тухай Даваа гарагт Пентагоны албаны хүн мэдээлж байв.
Харин Украины тал түүнийг их бууны сумны хэлтэрхийд оногдож, шархадсан тухай мэдээлсэн юм.
Бямба гарагт Харьков мужийн Изюм хот дахь Оросын цэргийн удирдлагын төвд Украины талаас цохилт өгөх үеэр Герасимов шархадсан тухай уг мэдээлэлд дурджээ.
Дайны талбарт алагдсан генералуудын дотор Оросын 8 дугаар армийн дэд командлагч Владимир Петрович Фролов, 41 дүгээр армийн тэргүүн дэд командлагч Виталий Герасимов, 331 дүгээр десантын дивизийн командлагч Сергей Сухарев зэрэг өндөр албан тушаалтнуудын нэр яригдаж байгаа.
Украинд тулалдаж буй орос цэргүүдийн сэтгэл зүй сул байгаа нь генералуудыг фронтын шугамд ойр ажиллахад хүргэж байна гэж өрнөдийн албаныхан үзэж байна.
Бас Оросын зэвсэгт хүчин дотоод харилцаа холбоондоо нууцлалгүй шугам ашиглаж байгаа нь генералууд Украины цохилтод өртөх эрсдэлийг нэмэгдүүлж байгааг тайлбарлажээ.
Өрнөдийн орнууд Украины зэвсэгт хүчнийг тагнуулын мэдээллээс гадна зэр зэвсэг, техник хэрэгслээр байнга хангаж байна.
“Украинд халдсан шиг үйлдэл дахин гаргаж чадахгүй болтол нь Оросыг доройтуулах нь бидний зорилго юм” гэж АНУ-ын батлан хамгаалахын сайд Ллойд Остин өнгөрсөн сарын сүүлээр Киевт айлчлахдаа хэлсэн юм.
Эх сурвалж: AFP
