Өчигдөр төрийн ордонд болсон Эрүүл мэндийн даатгалын үндэсний зөвлөлийн тайлангийн асуудал дээр нэлээн ноцтой асуудлууд яригдсан билээ. ЭМДЕГ "Капитал" банкнаас 29 орон сууц хүлээн авсан ба эдгээрийн ихэнхийг нь өөрсдөө авсан нь УИХ-ын гишүүдийн бухимдалыг төрүүлсэн юм.
Энэ талаар сэтгүүлч Б.Отгон өөрийн цахим хуудаснаа "Энэ бол Эрүүл мэндийн даатгалын газар цэвэр өөртөө давуу байдал олгосон албан тушаал авлигалын гэмт хэрэг. Эрүүл мэнд нийгмийн даатгалын мөнгийг хадгалж байсан "Капитал" банк дампуурчээ. Тэр мөнгөөр барьсан орон сууцаа төрд хураалгасан чинь түүнийг нь Эрүүл мэндийн даатгалын газрын албан хаагчид хуваагаад авчихжээ. Энэ орон сууц бол даатгал төлөгчдийн мөнгөөр баригдсан, даатгуулагчдын өмч болохоос энэ цөөхөн хүмүүсийн өмч биш. Төрийн албан хаагчдад урт хугацааны ипотекийн зээл өгөх гэж ард түмэн эрүүл мэндийн даатгал төлдөггүй шүү. Эзэд нь өөрсдөө эхнээсээ хулгайгаа яриад эхэллээ. Зайсанд 2,6 саяар ипотекийн зээлээр авсан гэнгүүтээ одоогийн ханштай харьцуулаад байв? гэж хэлээд хямдхан авсан гэдгээ нотоллоо. Энэ хугацаанаас нь хагас жил ч өнгөрөөгүй байна. Ийм л ёс зүйтэй, хүмүүс төрд ажиллаж байна гэхээр улс орон уруудан доройтохоос өөр яалтай билээ. Хадгаламж зээлийн хоршоо дампуурахад яг ийм байдлаар хураагдсан эд хөрөнгө дээр нь төрийн албан хаагч, эрх мэдэлтнүүд найрласан. Капитал банкны дампуурал дээр яг давтагдаж байна. Энэ орон сууцыг хэн гэдэг, хэдэн ажилтан ямар үнээр, ямар шалгуураар авсныг судална аа. Мэдээлэл өгөх хүмүүс чатаар холбогдоорой. Эх сурвалжийг чандлан нууцална. Бид нийтээрээ ингэж дээрэлхүүлж, эднийг өөгшүүлж, даврааж болохгүй ээ" хэмээжээ.
