Оросын түрэмгийлэгчидтэй тэмцэж буй украинчуудад SpaceX компанийн Starlink хиймэл дагуулын интернэтэд холбогдох систем чухал үүрэг гүйцэтгэж байгаа гэсэн мэдээлэл бий.
Америкийн тэрбумтан Илон Маск уг системийнхээ олон тооны терминалыг Украинд тусламжаар илгээсэн юм.
Оросын тал Starlink-ийн дохиог тасалдуулах оролдлогоо сүүлийн өдрүүдэд эрчимжүүлсэн ч үр дүн муутай байгааг Маск өчигдөр мэдээлжээ.
“Оросын талаас явуулж буй хакдах, дохио тасалдуулах зорилготой ажиллагааг Starlink зогсоосоор байгаа. Гэхдээ тэд оролдлогоо улам нэмэгдүүлж байна” гэж Илон Маск твиттер хуудсандаа бичсэн байна.
Гуравдугаар сард анхны ийм оролдлогын тухай Маск мэдээлж байв. Тухайн үед Оросын талаас үйлдсэн халдлагыг бүрэн зогсоож чадсанаа бас мэдэгдэж байжээ.
SpaceX компанийн мэдээлснээр одоо Украинд 150,000 орчим идэвхтэй хэрэглэгч Starlink системийг ашиглан интернэтэд холбогдож байгаа юм байна.
Бүр Мариуполийн Азовсталь үйлдвэрт эсэргүүцэн тулалдаж буй Украины цэргүүдэд нисдэг тэргээр Starlink-ийн терминалыг хүргэж өгсөн гэх мэдээлэл бий.
Оросын сансар судлалын Роскосмос байгууллагын тэргүүн Дмитрий Рогозин саяхан “фашистуудад” ийм тусламж үзүүлснийхээ төлөө Илон Маск хариуцлага хүлээх ёстой хэмээн сүрдүүлж байв.
Үүний хариуд Маск өөрийгөө “учир битүүлэг шалтгаанаар амиа алдаж болзошгүй боллоо” хэмээн хариу хошигносон юм.
Эх сурвалж: Business Insider