Мариуполь хотыг Оросын эзлэн түрэмгийллээс хамгаалан 80 гаруй хоног тулалдсан Украины цэргүүд сүүлчийн түшиц газар болсон Азовсталь төмөрлөгийн үйлдвэрээ бүрэн орхиж гарчээ.

Оросын тал Украины цэргүүдийг бууж өгсөн гэж мэдээлж байна. Харин Украины тал ийм үг хэрэглэхээс зайлсхийж, даалгавар биелсэн тул эсэргүүцлээ зогсоолоо гэж мэдээлжээ.

Даваа гарагт шархадсан 260 гаруй цэргийг Мариуполиос салан тусгаарлагчдын хяналтад байгаа хоёр хот руу нүүлгэн шилжүүлсэн юм.

Мягмар гарагт үйлдвэрийн цогцолборт үлдсэн тодорхойгүй тооны цэргүүдийг бас нүүлгэжээ.

Ингэснээр Оросуудын хувьд Мариуполийг бүрэн хяналтдаа оруулсан нь Украинд халдан довтолсноосоо хойших хамгийн том ялалт болж байна. Одоо Украины тал цэргүүдээ олзны хүмүүсээр солих зорилго тавиад байгаа аж.

Гэхдээ солилцох яриа хэлэлцээ нэлээд хэцүү байх төлөвтэй байна.

Украины үндэсний аюулгүй байдлын зөвлөлийн тэргүүн асан Олександр Данилюк цэргүүдээ Оросын олзлогсдоор солилцох яриа хэлэлцээг эхлүүлэхээ мэдэгджээ.

Харин Оросын парламентын доод танхимын спикер Вячеслав Володин үйлдвэрийг хамгаалагчдын дунд дайны гэмт хэрэгтнүүд байгаа тул тэднийг солилцолгүй, хэргийг нь шүүх ёстой гэж хэлсэн байна.

Азовсталь үйлдвэрт олон хоногийн турш хамгаалан тулалдсаны үр дүнд Оросын 20,000 орчим цэрэг Донбассын фронтод тулалдалгүй Мариупольд үлдсэн нь Украины талд хүчээ төвлөрүүлэх, сөрөг довтолгоонд бэлдэх хугацаа өгсөн гэж Киевийн албаныхан тайлбарлаж байгаа. Саяхан Украины хоёр дахь том хот Харьковын орчмоос Оросын цэрэг ухарч, Украины цэргүүд Оросын хилд хүрсэн нь бас Мариуполийг хамгаалагчдын гавьяа гэж тэд үзэж байна.

Эх сурвалж: Associated Press