Украинд дайн эхэлснээс хойш Оросын эрх баригчид мэдээллийн хэрэгсэлд тавих хяналтыг чангатгаж, сөрөг хүчний дуу хоолойг хааж боодог болоод байгаа.
Харин Даваа гарагийн орой Оросын батлан хамгаалах салбарын алдартай шинжээч Украины дайныг хатуу шүүмжилсэн байр сууриа төв телевизийн сувгаар илэрхийлсэн нь ховорт тооцогдох үзэгдэл болжээ.
Кремлийн суртал нэвтрүүлэгчдийн нэг Ольга Скабеевагийн хөтөлдөг “600 минут” ярилцлагын нэвтрүүлэгт оролцсон чөлөөнд гарсан хурандаа Михайл Ходаренок “Юуны өмнө та мэдээллийг зөөлрүүлэх эм уух гээд хэрэггүй” гэж үгээ эхэлсэн юм.
Extraordinary exchange on Russian state TV’s top talk show about Ukraine. Military analyst & retired colonel Mikhail Khodarenok tells anchor Olga Skabeyeva “the situation for us will clearly get worse…we’re in total geopolitical isolation…the situation is not normal.” pic.twitter.com/ExMwVDszsk
— Steve Rosenberg (@BBCSteveR) May 16, 2022
Тэрбээр цааш нь “Шулуухан хэлэхэд бидний нөхцөл байдал цаашид улам муудахаар байна. Эх орноо хамгаалах хүсэл эрмэлзэл Украины талд байгаа тул тэд эцсээ хүртэл тэмцэх нь тодорхой. Бид цэрэг, улс төрийн бодит нөхцөл байдлын мэдрэмжтэй баймаар байна. Хэрвээ бид энэ байдлаар үргэлжлүүлбэл түүхэн үнэний маш хүчтэй цохилтыг амсах болно. Бүгдийн сайн сайхны төлөө ядаж Финланд руу пуужин чиглүүлээд хэрэггүй. Ингэх нь инээдтэй харагдаж байна” гэж ярьжээ.
“Манай цэрэг, улс төрийн байр суурийн гол дутагдал нь бид геополитикийн хувьд бүрэн ганцаардсанд оршиж байна. Гэвч бид үүнийгээ хүлээн зөвшөөрөхийг хүсэхгүй байгаа. Бараг бүх дэлхий манай эсрэг байна. Энэ байдлаас гарах шаардлагатай” гэж Ходаренок хэлсэн байна.
Ходаренок одоо gazeta.ru сайтад батлан хамгаалах чиглэлийн нийтлэл бичдэг. Тэрбээр өмнө нь Украинд халдан довтлох нь Оросын үндэсний ашиг сонирхол биш гэсэн санааг тодорхой илэрхийлж байжээ.
Эх сурвалж: Reuters
