Энгийн иргэний амийг хөнөөсөн Оросын армийн алба хаагчид Украины шүүх өчигдөр бүх насаар нь хорих ял оноолоо.
Энэ нь Украинд дайны гэмт хэрэг үйлдсэн этгээдэд шүүхээс шийтгэл оноосон анхны тохиолдол юм. 21 настай олзны цэрэг, дэслэгч Вадим Шишимарин нь хоёрдугаар сарын 28-ны өдөр Украины зүүн хойд бүсийн Чупаховка тосгонд 62 настай иргэн Олександр Шелиповыг буудан хөнөөж байжээ.
Москвагийн эрх баригчид цэргүүд нь энгийн иргэдийг алж хядаж байгааг үгүйсгэдэг ч Украины тал 11,000 гаруй гэмт хэрэг үйлдэгдсэнийг бүртгэснээ мэдээлж байна.
Шишимарин нь Оросын Кантемировская танкийн дивизэд алба хааж байжээ. Тэрбээр иргэдээс олзолсон суудлын автомашинаар өөр нэг цэрэгтэй зорчиж явахдаа зам дээр дугуйтай явсан Шелиповтой тааралдаад буудаж хөнөөсөн юм байна.
Дээд тушаалын офицер нь энгийн иргэн рүү буудах тушаал өгснийг Шишимарин прокурорт мэдүүлжээ. Дээрээс өгсөн тушаалыг биелүүлсэн гэсэн үндэслэлээр шүүхийн шийдвэрийг давж заалдахаа түүний өмгөөлөгч мэдэгдсэн байна.
Шүүх хурлын үеэр хохирогчийн бэлэвсэн эхнэр Катерина Шелипова “Та нар яах гэж энд ирснээ надад хэлээч? Биднийг хэнээс хамгаалах гэсэн юм бэ? Намайг нөхрөөс минь хамгаалах гэсэн юм уу?” гэж Шишимаринаас асууж байв.
Шишимарин уг асуултад хариулаагүй ч өөрийг нь уучлахгүйг ойлгож байгаагаа хохирогчийн эхнэрт хэлсэн юм.
Хоёрдугаар сарын 24-нд Оросын цэрэг Украинд халдан довтолсноос хойш 3,838 энгийн иргэн алагдаж, 4,351 иргэн шархадсан гэх тоо баримтыг НҮБ мэдээлжээ.
Тэдгээрийн дотор эзлэгдсэн нутаг дэвсгэрт үйлдэгдсэн дайны гэмт хэргийн олон хохирогч байгаа гэж үзэж байна. Оросын тал бас Украины олзны цэргүүдийг шүүх ажиллагаа явуулахаар бэлдэж буй тухай мэдээлэл ирж байгаа.
Эх сурвалж: BBC