Дэлхийн улс орнуудад сармагчны цэцэг өвчний вирусээр халдварласан тохиолдлууд илэрсээр байна.
Мягмар гарагт Арабын Нэгдсэн Эмират улсад уг вирусээр халдварласан тохиолдол анх удаа бүртгэгдсэн нь Персийн булангийн бүс нутагт анхных болжээ.
Өчигдөр бас Европ тивийн Чех, Словени улсуудад анхны тохиолдлууд бүртгэгдсэнийг албаны эх сурвалжууд мэдээлсэн юм.
Урьд өмнө нь голдуу Африк тивийн орнуудаас хэтэрдэггүй байсан сармагчны цэцэг өвчний дэгдэлт өнөөдрийн байдлаар Европ, Америк, Австрали, Ази тивийн нийт 18 оронд илрээд байна.
Уг өвчин туссан хүмүүсээс халуурах, биеэр тууралт гарах шинж тэмдгүүд илэрдэг ч хүндэрч, амь насанд эрсдэл учруулдаггүйг мэргэжлийн байгууллагууд баталж байгаа.
Тиймээс сармагчны цэцэг өвчний энэ удаагийн дэгдэлт цар тахлын хэмжээнд хүрэхгүй гэж Дэлхийн Эрүүл Мэндийн Байгууллага үзэж байна.
Харин хяналтаа нэмэгдүүлж, халдвар тархалтыг хязгаарлах зөв арга хэмжээнүүдийг авч хэрэгжүүлэхийн чухлыг анхааруулж байгаа.
Өнөөдрийн байдлаар Африк тивээс гадна халдварын нийтдээ 237 батлагдсан болон сэжигтэй тохиолдол бүртгэгдээд байна.
Герман улс дэгдэлт аюултай хэмжээнд хүрсэн тохиолдолд ашиглах зорилгоор салхин цэцэг өвчний 40,000 тун вакцин захиалснаа өчигдөр мэдээлжээ.
Сармагчны цэцэг өвчний эсрэг бүтээгдсэн вакцин байдаггүй ч салхин цэцгийн вакцин 85 хувийн үр дүнтэй хамгаалдаг юм байна.
Эх сурвалж: BBC