Украинд Оросын зэвсэгт хүчин халдан довтолсноос хойш Хар тэнгисийн боомтуудад 20 гаруй сая тонн үр тариа хуримтлагдаад байгаа.
Эдгээрийг гадаад зах зээлд экспортлох замыг Оросын тэнгисийн флотын хөлгүүд хаагаад байгаа юм. Украин болон Орос улсууд нийлээд дэлхийн улаан буудайн нийлүүлэлтийн бараг гуравны нэгийг бүрдүүлдэг. Украин улс бас эрдэнэ шиш, наранцэцгийн дэлхийн томоохон экспортлогч юм. Оросын хөлгүүд Украины далайн тээврийн замыг хаасан нь дэлхий дахиныг хамарсан хүнсний хямралд хүргэж болзошгүй болоод байна.
Тэгвэл Украины далайн тээвэрлэлтийг зөвшөөрсний хариуд Өрнөдийн орнуудын тавьсан эдийн засгийн хоригийг цуцлуулах сонирхолтой байгаагаа Москвагийн албаны хүн илэрхийлжээ.
“Хүнсний экспортын асуудлыг шийдэхийн тулд Оросын экспорт, санхүүгийн гүйлгээнд тавьсан хориг арга хэмжээнүүдийг цуцлах шаардлагатайг бид удаа дараа мэдэгдэж байгаа” гэж ОХУ-ын гадаад хэргийн дэд сайд Андрей Руденко өчигдөр ярьсныг Интерфакс агентлаг дамжуулсан байна.
Москва энэ асуудлаар НҮБ-д хандсан тухай тэр бас мэдээлжээ.
Гэхдээ Украины экспортын хөлөг онгоцнуудыг Өрнөдийн байлдааны хөлгүүд дагалдах ёсгүйг Руденко анхааруулсан байна.
Хэрвээ ингэвэл Хар тэнгисийн нөхцөл байдал улам хурцдах аюултайг тэр хэлжээ.
Руденко бас Украины боомтуудаас Оросын тал үр тариа хулгайлж байгаа гэсэн мэдээллийг няцаасан байна. Оросын тал Украинаас олзолсон үр тариагаа Крымийн хойгоор дамжуулан гаргаж байгааг харуулсан хиймэл дагуулын гэрэл зургийг өмнө нь Өрнөдийн зарим хэвлэл үзүүлж байсан юм.
Эх сурвалж: Reuters
