Мягмар гарагт Молдов улсын эрх баригчид тус улсын ерөнхийлөгч асан Игорь Додоныг авлигын хэргээр 72 цагийн хугацаатай саатуулсан юм.
Москвагийн бодлогыг дэмжигч, Европт нэгдэхийг эсэргүүцэгч Додон 2016-2020 онуудад Молдовын ерөнхийлөгчөөр ажиллаж байжээ.
Молдовын Авлигатай Тэмцэх Прокурорын Газар эхлээд Додонд “авлига авсан, улс төрийн намыг хууль бус аргаар санхүүжүүлсэн, хууль бус арга замаар хөрөнгөжсөн” гэсэн гурван ял тулгаснаа зарлаж байв.
Тэгвэл өчигдөр түүнд эх орноосоо урвасан ялыг нэмж тулгаснаа мэдэгджээ.
Мөн Додоныг саатуулах хугацааг 30 хоногоор сунгах хүсэлтийг шүүхэд гаргасан байна. Хугацааг сунгах шийдвэрийг нийслэл Кишинау хотын шүүх өнөөдөр буюу Пүрэв гарагт гаргах гэнэ.
Додон, Путин нар
Экс ерөнхийлөгч “улс төрийн өрсөлдөгчдөө айлган сүрдүүлж, Бүгд Найрамдах Молдов Улсад дарангуйлагч дэглэм тогтоохыг санаархсан” тул эх орноосоо урвасан хэрэгт буруутгажээ.
Игорь Додон өөрт нь тулгасан хэргүүдийг үгүйсгэж, өөрийгөө улс төржсөн, зохион байгуулалттай шүүхийн хохирогч болсныг мэдэгдсэн байна.
Додоны тэргүүлдэг Социалистуудын Нам өчигдөр нийслэл Кишинау хотод эсэргүүцлийн цуглаан зохион байгуулж, цааш үргэлжлүүлэн тэмцэхээ мэдэгджээ.
Кремлийн хэвлэлийн төлөөлөгч Дмитрий Песков баривчилгаатай холбогдуулан хийсэн мэдэгдэлдээ “ОХУ-тай найрсаг, харилцан ашигтай харилцааг дэмжигчдийн эсрэг ийм үйлдэл, хавчлага гаргаж буйд Москва санаа зовж байна” гэж хэлсэн ч үүнийг Молдов улсын дотоод асуудал гэж тодорхойлсон байна.
Эх сурвалж: Reuters