Монгол Улсын 33 тэрбум ам.долларын гадаад өрний 12.5 тэрбум ам.доллар нь Оюутолгойнх гэдгийг УИХ-ын чуулганы хуралдаан дээр Төсвийн байнгын хорооны дарга Ч.Хүрэлбаатар хэлэв. Энэ үеэр УИХ-ын гишүүн Х.Болорчулуун Оюутолгойн өр нь Монгол Улсын зээлжих зэрэглэлд нөлөөлж байгаа учраас Монгол Улсын өрнөөс тусад нь авч үзэх боломжтой эсэх, цаашид хэрхэн зохицуулалт хийх талаар асуусан юм.
Төсвийн байнгын хорооны дарга Ч.Хүрэлбаатар “Өнгөрсөн хугацаанд хамгийн гол бүтээн байгуулалтын ажил бол Оюутолгойн уурхай. Хувийн хэвшлийнхэн гаднаас зээл аваад бүтээн байгуулалт явуулж байгааг бид буруутгах аргагүй. Үндэсний аж ахуйн нэгжүүд, Оюутолгойн ажлууд зээлээрээ санхүүжигдээд явж байна. Энэ нь эргэж төлөгдөх өр гэдэг агуулгаараа улсын өрөнд ороод явж байгаа. Хувийн хэвшлийн авч байгаа өрийг бид зохицуулах гэх нь буруу. Гурван ам.доллар тутмын 1 нь Оюутолгойн бүтээн байгуулалт. Зэсийн үнэ өндөр байхад эргээд төлөгдчих байх гэж бодож байна.Тиймээс Засгийн газар Засгийн газрынхаа өрийн удирдлагыг л авч, харин хувийн хэвшлийн өрийг хязгаарлах нь эргээд бүтээн байгуулалтад сөргөөр нөлөөлнө гэж бодож байна. Анхааруулах хэмжээнд хүрээд эхэлбэл анхааруулах нь зөв байх” гэсэн хариулт өгсөн юм.