Оросын тэрбумтан Роман Абрамовичийн эзэмшдэг Английн хөл бөмбөгийн Челси клубийг худалдах наймаа Даваа гарагт өндөрлөжээ.
Лос-Анжелес Дожерс бэйсболын клубийн хувийг эзэмшдэг Тодд Боэли тэргүүтэй АНУ-ын консорциум Челси клубийг $3.2 тэрбумаар худалдаж авсан нь түүхэнд спортын баг хамгийн өндөр үнэ хүрсэн тохиолдол болсон байна.
Челси клубийг 19 жилийн турш эзэмшиж байсан Абрамович энэ оны гуравдугаар сард Украины хямралтай холбоотой Их Британийн засгийн газраас зарласан эдийн засгийн хоригт багтсан тул эзэмшлээ зарахаас өөр аргагүй болсон юм.
Абрамовичийн хөрөнгийг битүүмжилсний дараа Челси клуб Их Британийн засгийн газрын удирдлагад шилжиж байжээ. ОХУ-ын ерөнхийлөгч Владимир Путинтэй ойр харилцаатай гэсэн үндэслэлээр Абрамович хоригт багтсан юм.
Клубийг худалдаж авах өрсөлдөөнд 250 орчим этгээд оролцсон байна.
Гэхдээ энэ наймаанаас ашиг олох Абрамовичийн боломжийг Их Британийн засгийн газар хаах зохицуулалт хийгээд байгаа.
Боэлийн консорциум Челсигийн эрэгтэй, эмэгтэй багууд, дэд бүтцэд нэмж $2.2 тэрбумын хөрөнгө оруулахаар амласан байна.
Абрамовичийн эзэмшлийн он жилүүдэд Челсигийн эрэгтэй хөл бөмбөгийн баг нийт 21 цом хүртэж байсан юм. Үүнд 2012, 2021 онуудын Аваргуудын Лигийн цом багтаж байна.
Эх сурвалж: Associated Press
