АНУ-ын ерөнхийлөгч Жо Байден алсын тусгалын пуужингийн шинэ системийг Украинд нийлүүлэх болсон шийдвэрээ өчигдөр зарласан юм.
Ийм зэвсэг ОХУ-ын газар нутгийн гүнд цохилт өгөх боломжийг Украины талд өгөх тул АНУ-ын засаг захиргаа шийдвэр гаргахаасаа өмнө нэлээд эргэлзэж байв.
Харин Киевийн эрх баригчид зэвсгийг ийм зорилгоор ашиглахгүй гэсэн амлалт өгсний дараа Вашингтон шийдвэрээ гаргасан байна.
Ээлжит тусламжийн хүрээнд дөрвөн ширхэг M142 High Mobility Artillery Rocket Systems (HIMARS) системийг Украинд илгээхээр болжээ.
Ийм зэвсэгтэй болсноор Украины талд давуу тал бий болж, хүчний харьцааг тэнцүүлснээр дайныг дуусгах яриа хэлэлцээнд ахиц гарах боломж нээгдэнэ гэж үзэж байгаагаа Жо Байден өчигдөр мэдэгдсэн байна.
“Энэ бол алсын зайд өндөр нарийвчлалтай цохилт өгөх чадвартай зэвсэг юм. Ийм зэвсэг хэрэглэж эхэлснээр фронтод тулалдаж буй Украины зэвсэгт хүчинд томоохон давуу тал бий болно” гэж АНУ-ын батлан хамгаалах яамны төлөөлөгч мэдэгджээ.
HIMARS нь 70 км зайтай орших байнд олон зэрэг пуужингийн цохилт өгөх чадвартай. Энэ нь одоо Украины зэвсэгт хүчний хэрэглэж буй их буунуудын зайнаас хамаагүй хол зай юм.
Бас Оросын армийн хэрэглэж буй ижил төстэй зэвсгээс нарийвчлалын хувьд илүү өндөр гэгдэж байгаа. Тухайлбал HIMARS-ийн пуужингууд GPS системээр удирдагддаг юм байна.
Украины ерөнхийлөгч Володимир Зеленский шинэ зэвсгийг ОХУ-ын нутаг дэвсгэрт цохилт өгөх зорилгоор ашиглахгүйгээ мэдэгджээ.
“Бидэнд ОХУ-ын нутаг дэвсгэрт юу болж байгаа нь сонин биш. Бид зөвхөн Украинд буюу өөрийн газар нутагт анхаарал хандуулах болно” гэж тэр ярьсан байна.
Харин Кремлийн хэвлэлийн төлөөлөгч Дмитрий Песков түүний хэлсэн үгэнд итгэхгүй байгаагаа өчигдөр илэрхийлжээ.
“Киевийн эрх баригчид амлалтаа биелүүлж байсан түүхгүй тул тэдэнд итгэхэд хэцүү байна. АНУ санаатайгаар дайны гал дээр тос нэмж байна гэж бид үзэж байна. Тэд сүүлчийн украин хүнийг үлдэх хүртэл мөргөлдөөнийг үргэлжлүүлэх сонирхолтой байгаа нь тодорхой боллоо” гэж тэр РИА Новости агентлагт ярьсан байна.
Эх сурвалж: BBC
