Украины үр тариаг экспортлоход Орос саад болохгүй гэж Кремлийн хэвлэлийн төлөөлөгч Дмитрий Песков мэдэгдэв.
"Түүгээр ч барахгүй хэрэв Украйн боомтуудыг минагүйжүүлж, далайн аюулгүй навигац хийх нөхцөлийг хангаж чадвал Орос олон улсын усан хилд хүртэл нь дагалдан хамгаалахад бэлэн байна." гэж Песков тодотгов.
Дайны өмнө Украины экспортын 90% нь Хар тэнгисийн гүний боомтоор дамждаг байв. Тус улс үр тариаг Хятад эсвэл Энэтхэг рүү хол зайд тээвэрлэх боломжтой том хөлөг онгоцонд ачиж. энэ экспортоосоо ашиг олдог байв.
Орос тусгай ажиллагааныхаа явцад Украины эрэг орчмын ихэнх хэсгийг эзлэн авч, эргийн үлдсэн хэсгийн дагуу флотил болон шумбагч онгоцуудаа байрлуулжээ. Үүнээс болж боомтууд ажиллах боломжгүй болж, хөлөг онгоцууд үр тариа тээвэрлэж чадахгүй байгаа юм.
Орос улс Укоаины үр тарианы экспортод саад учруулахгүй гэж мэдэгдэж байгаа ч 5-р сарын 23-нд ГХЯ-ны дэд сайд Андрей Руденко барууны орнууд Оросын экспортод тавьсан хоригоо цуцалсны дараа л Украины хаагдсан боомтуудаас үр тариа экспортлох боломжтой болно гэж мэдэгдэж байв.
"Оросын экспортын эсрэг авсан бүх хязгаарлалтыг цуцлах хэрэгтэй. Эдгээр хориг арга хэмжээ нь хүнс, бордоонд нөлөөлөхгүй гэж хэлэх нь бодит үнэнээс хол юм " гэж тэр хэлэв.
Өнгөрсөн долоо хоногт Их Британийн тагнуулын албаныхан Хар тэнгист Оросоос бодит аюул заналхийлсээр байгаа тул Украин эрэг орчмын бүсийг минажуулсан гэж мэдэгджээ.
Москвагийн мина устгах шаардлагууд нь Оросын өнөөгийн мэдээллийн стратегийн үндсэн зарчимтай уялдаж байгаа бөгөөд энэ нь олон нийтэд юу болж байгааг ойлгоход хэцүү нөхцөл байдал бий болгодог хэмээн тус тагнуулын тайланд дурджээ.
Тодотгоход, Украины боомтуудад 25 сая тонн үр тариа түгжигдсэн гэж Герман мэдэгдсэн бол НҮБ 14 сая тонн гэж мэдээлэв. Европын холбоо үр тариа экспортлох тэнгисийн цэргийн номлолыг эхлүүлэхээр хэлэлцэж байна гэж хэвлэлүүд бичжээ. Европын дипломатын тэргүүн Жозеп Боррел эхний удаад Оростой энэ асуудлыг зохицуулахыг уриалсан. Харин Владимир Путин хориг арга хэмжээг цуцалсны дараа Украины үр тарианы экспортыг хөнгөвчлөхөд бэлэн байна гэжээ.
Эх сурвалж: ВВС, kommersant.ru