Украины газар нутагт Оросын цэрэг халдан довтолсонтой холбоотойгоор Европын бас нэг улсын уламжлалт гадаад бодлого эрс өөрчлөгдөж байна.
Дани улсад явуулсан бүх нийтийн санал хураалтад оролцогчдын 66.9 хувь нь Европын Холбооны хамтын батлан хамгаалах гэрээнд нэгдэх сонголтыг хийжээ. Үлдсэн 33.1 хувь нь нэгдэхийг эсэргүүцсэн байна.
Европын интеграцчилалд эргэлзсээр ирсэн түүхтэй Дани улс нь сүүлийн 30 орчим жилийнхээ түүхэнд анх удаа төвд тэмүүлэх чухал сонголт хийсэн нь энэ юм.
“Тивд нь дайн болж байгаа тохиолдолд бид төвийг сахих боломжгүй юм. Европын Холбооны санал хураалтад Дани улс хамгийн том “ТИЙМ” гэж хариулсан нь энэ байх” гэж тус улсын ерөнхий сайд Метте Фредериксен мэдэгджээ.
5.8 сая хүн амтай Дани улс нь НАТО-г үүсгэн байгуулалцсан орнуудын нэг мөн боловч Европын Холбооны хамтын батлан хамгаалах гэрээнд нэгдээгүй цорын ганц гишүүн байсан юм.
Оросын цэрэг Украинд халдан довтолсны дараа гуравдугаар сард тус улсын засгийн газар энэ асуудлаар бүх нийтийн санал хураалт явуулах уриалгыг анх гаргаж байжээ.
Умард Европын орнуудаас Швед, Финланд улсууд бас НАТО-д элсэх түүхэн шийдвэр гаргаад байгаа.
Данийн өмнөд хөрш Герман улс өнгөрсөн долоо хоногт түүхэндээ байгаагүй өндөр батлан хамгаалах төсвийг баталсан нь бас Украины дайнтай холбоотой байв.
1973 онд Европын Холбоонд нэгдсэн Дани улс өнөөдрийг хүртэл еврог хүлээн зөвшөөрөөгүй, хууль зүй, дотоод хэргийн асуудлаа тусдаа шийдсээр ирсэн юм.
Европын Холбоонд илүү гүнзгий интеграцчилагдах асуудлаар болсон өмнөх санал хураалтууд үргэлж эсрэг үр дүнтэй гарч байжээ.
Эх сурвалж: Bloomberg
