Дэлхийн хамгийн баян хүн гэгддэг Илон Маск саяхан Тесла компанийн нийт ажилтнуудад илгээсэн захидалдаа зайнаас ажиллах горимоос бүрэн татгалзаж, оффистоо цуглахыг шаарджээ.

Америкийн компаниудын ихэнх нь цар тахлын үеэр зайнаас буюу гэрээсээ ажиллах горимд шилжээд байсан юм. Харин тахлын нөхцөл байдал сайжирч, буцаад оффистоо ажиллах болоход компаниуд зарим ажилтнуудынхаа эсэргүүцэлтэй тулгарч эхлээд байгаа.

Мягмар гарагт илгээсэн “To be super clear” гарчигтай захидалдаа Маск “Теслагийн бүх ажилтан долоо хоногт хамгийн багадаа 40 цагийг оффис дээрээ зарцуулах шаардлагатай. Ингэхдээ гэртээ ойр аль нэг салбар оффист ажиллана гэсэн үг биш, бусад хамтрагчидтайгаа хамт суух оффисыг хэлж байна. Хэрвээ шаардлагыг хүлээж авахгүй бол ажлаас гарсан гэж үзнэ” гэж бичжээ.

Саяхан Маск тус компанийн Хятад дахь үйлдвэрийн ажилчдын хичээл зүтгэлийг твиттер хуудсандаа магтан бичиж байв. Ингэхдээ тэр ажилдаа ирэхээс зайлсхийж буй Америкчуудыг харьцуулан шүүмжилж байжээ.

Хоёр сар орчим хугацаанд хатуу хөл хорионы дэглэмд байсан Шанхай хотод Теслагийн үйлдвэр байрладаг юм. Хөл хорионы үеэр тус үйлдвэрийн ажилчид үйл ажиллагаагаа тасалдуулахгүйн тулд гэртээ харилгүй үйлдвэр дээрээ хоноглон ээлжээр ажиллаж байжээ.

Ер нь Илон Маскийг ажилтнууддаа хатуу ханддаг тухай баримт олон бий. Жишээ нь саяхан Твиттер компанийг худалдан авах шийдвэр гаргасных нь дараа тус компанийн ажилтнууд Маскийн удирдлага дор ажиллахаас айж байгаагаа илэрхийлцгээж байжээ.

Эх сурвалж: Bloomberg