Ням гарагт Украины нийслэл Киев хот Оросын пуужингийн цохилтод өртжээ. Дөрөвдүгээр сарын сүүлээр тус хот хамгийн сүүлд агаарын довтолгоонд өртөж байсан ба сүүлийн сар гаруй хугацаанд нөхцөл байдал харьцангуй тайван байсан юм.
ОХУ-ын батлан хамгаалах яам энэ цохилтоороо Европын орнуудаас Украинд нийлүүлсэн танкуудыг устгасан гэж мэдээлж байна.
Харин Украины тал Киев дэх галт тэрэгний засварын үйлдвэр цохилтын бай болсныг мэдээлжээ.
Энэхүү халдлагын дараахан ОХУ-ын ерөнхийлөгч Владимир Путин төв телевизийн сувагтаа ярилцлага өгсөн байна.
Ярилцлагадаа тэр өрнөдийнхөн Украинд нэмж зэвсэг илгээсээр байх юм бол агаарын цохилтоо өргөжүүлэх тухай анхааруулжээ.
“Зэвсэг нийлүүлсээр байгаа нь мөргөлдөөнийг аль болох сунжруулах гэсэн ганцхан зорилготой гэж би харж байна. Хэрвээ тэд үргэлжлүүлэн зэвсэг нийлүүлсээр байх юм бол бид хараахан довтлоогүй байгаа шинэ байнуудад цохилт өгөх болно. Бидэнд зэвсэг хангалттай бий” гэж Путин ярьсан байна.
Хэдхэн хоногийн өмнө АНУ-ын засаг захиргаа 70 хүртэл километр зайд өндөр нарийвчлалтай цохилт өгөх чадвартай M142 High Mobility Artillery Rocket System (HIMARS) пуужингийн системийг Украинд илгээхээр болсон юм.
Энэ нь одоо Украины армийн ашиглаж буй их буунуудаас хамаагүй хол зайд тусах чадвартай гэсэн үг.
Ийм зэвсэгтэй болбол Украины тал ОХУ-ын газар нутгийн гүнд довтлох боломжтой болох юм. Хэрвээ ингэвэл дайны цар хүрээ өргөжих эрсдэлтэй тул Вашингтон ээлжит тусламжийн багцдаа HIMARS-ийг багтаах эсэхэд эргэлзэж байв. Украины ерөнхийлөгч Володимир Зеленский шинэ зэвсгийг өөрийн нутаг дэвсгэр дэх дайны талбараас хэтрүүлж ашиглахгүй гэсэн амлалт өгсний дараа АНУ-ын тал шийдвэрээ гаргасан юм.
АНУ-аас гадна Герман улс бүхэл бүтэн хотыг хамгаалах чадвартай хамгийн орчин үеийн агаарын довтолгооноос хамгаалах Iris-T системээ Украинд илгээх шийдвэрийг өнгөрсөн долоо хоногт зарлаад байгаа.
Одоо Донбассын аж үйлдвэрийн томоохон төв Северодонецк хотын төлөө тулаан талуудын хооронд үргэлжилж байна.
Оросын цэрэг тус хотын 80 орчим хувийг эзэлсэн тухай эхлээд мэдээлж байсан бол сүүлд Украины арми хотын тал хэсгийг буцаан эзэлж авснаа мэдээлжээ.
Хэрвээ энэ хотыг Оросын зэвсэгт хүчин бүрэн эзэлбэл Луганск мужийг бүхэлд нь хяналтдаа оруулах боломжтой болох юм. Северодонецк хотод 15,000 орчим энгийн иргэн үлдсэн ч нүүлгэн шилжүүлэх боломжгүй байгааг Луганск мужийн захирагч Сергей Хайдай саяхан мэдээлжээ.
Донбассын фронт дээр Оросын зэвсэгт хүчний генерал Роман Кутузов алагдсан тухай тус улсын төв телевизийн сурвалжлагч Александр Сладков өчигдөр мэдээлсэн байна.
Десантын цэргийн элит бүлгийн командлагч Кутузовыг “тулаанд хүмүүсээ тэргүүлж ороод амь үрэгдсэн” гэж Сладков сошиал хуудсандаа мэдээлсэн ч хаана гэдгийг дурдаагүй юм.
Тэрбээр Кутузовыг энэ дайнд амь үрэгдсэн Оросын дөрөв дэх генерал гэж мэдээлжээ. Харин Украины тал дайн эхэлснээс хойш Оросын 12 генерал амь үрэгдсэн гэж мэдээлж байгаа.
Украины ерөнхийлөгч Володимир Зеленский өчигдөр Запорожье хотод хүрэлцэн очиж, дайны талбараас, тэр дотроо Мариуполь хотоос дүрвэж ирсэн иргэдтэй уулзжээ. Энэ үеэр тэр дүрвэгчдэд бичиг баримт шинээр авах, орон гэртэй болоход нь туслахаа амласан байна.
Эх сурвалж: BBC
