ОХУ-ын гадаад хэргийн сайд Сергей Лавров энэ сарын 6-7-ны өдрүүдэд өөрийн холбоотон Серби улсад айлчлах ёстой байсан ч төлөвлөгөөгөө цуцлахаас өөр аргагүй болжээ.
Учир нь Сербийн хөрш Болгар, Монтенегро, Умард Македон улсууд ОХУ-ын нисэх онгоцнуудыг агаарын орон зайдаа нэвтрүүлэхгүй байх Европын Холбооны хоригт нэгдсэн тул Лавровыг нутаг дэвсгэр дээгүүрээ нисэхийг зөвшөөрөөгүй байна.
Оросын байгалийн хийгээс гүнзгий хамааралтай Серби улс Украины дайнтай холбоотой олон улсын ямар ч хоригт нэгдээгүй байгаа.
Серби нь Европ тив дэх ОХУ-ын үнэнч холбоотон юм. Косовогийн тусгаар тогтнолыг хүлээн зөвшөөрөхийг эсэргүүцдэг Сербийн байр суурийг Кремль тууштай дэмждэг. Мөн 1999 оны Косовогийн дайны үеэр Сербийг НАТО бөмбөгдсөн явдлыг ОХУ хатуу шүүмжилдэг.
Гуравдугаар сарын эхээр Белград хотын төвд Оросыг дэмжигчдийн томоохон жагсаал болж байв.
Лавровын айлчлал цуцлагдсан талаар сэтгүүлчид ОХУ-ын гадаад хэргийн яамнаас тодруулахад хэвлэлийн төлөөлөгч нь “бид хараахан телепортыг эзэмшээгүй байна” хэмээн хариулжээ.
Эх сурвалж: BBC
