Венесуэл улс ирэх сараас эхлэн Европын зах зээлд газрын тос нийлүүлэхээр болсныг албаны эх сурвалжууд мэдээлжээ.

Тухайлбал Италийн Eni, Испанийн Repsol компаниуд Венесуэлээс түүхий газрын тос импортолж эхлэхээр болсныг Европын албаны хэд хэдэн эх сурвалж Ройтерс агентлагт мэдээлсэн байна.

Өнгөрсөн долоо хоногт Европын Холбооны удирдлагууд Оросын газрын тосны импортод хэсэгчилсэн хориг тавьсан. Уг хориг Оросын импортын гуравны хоёрт шууд нөлөөлж байгаа ба 2022 оны сүүлээр 90 хувьд хүргэх төлөвлөгөөгөө Брюсселийн эрх баригчид зарласан юм.

Өмнөд Америкийн Венесуэл нь дэлхийн хамгийн том газрын тосны нөөцтэй улс.

Гэвч АНУ-ын засаг захиргаанаас тавьсан эдийн засгийн хоригийн үр дүнд 2019 оноос хойш газрын тосоо Европын зах зээлд нийлүүлэх боломжгүй болсон юм. Энэ удаа Венесуэлийн засгийн газрын өрийг газрын тосоор солилцох тохиролцоонд хүрсэн тухай мэдээлж байна.

Газрын тосны хоригийг сулруулсны хариуд Венесуэлийн ерөнхийлөгч Николас Мадуро бас сөрөг хүчнийхэнтэйгээ яриа хэлэлцээ эхлүүлж магадгүйг албаны эх сурвалж мэдээлжээ.

Оросын газрын тосны импортыг өөр эх үүсвэрээр орлуулах боломжийг Европын орнууд хайсаар байна.

Тухайлбал Францын сангийн сайд Бруно Ле Майр тус улсын засгийн газар энэ асуудлаар Арабын Нэгдсэн Эмират улсын талтай ярилцаж байгааг өчигдөр хэвлэлд ярьжээ.

Үүнээс гадна АНУ-ын засаг захиргаа эдийн засгийн хоригт байгаа бас нэг улс болох Иранаас газрын тос авах боломжийг судалж буй тухай эх сурвалжууд мэдээлсэн байна.

Эх сурвалж: Toim.mn